హైదరాబాద్‌లో ఎస్ఐఆర్ ప్రక్రియ మందగతి; బీఎల్‌ఓలు, ఓటర్లకు సవాళ్లు

తెలంగాణలో ఓటరు సమగ్ర జాబితా సవరణ (ఎస్ఐఆర్) ప్రక్రియ జూలై 5 నాటికి ఫారాల పంపిణీ పూర్తి చేయాలనే లక్ష్యంతో మొదలైంది. అయితే హైదరాబాద్, మేడ్చల్, రంగారెడ్డి జిల్లాల కోర్ అర్బన్ ప్రాంతంలో ఈ ప్రక్రియ మందకొడిగా సాగుతోంది.

ఈ మూడు జిల్లాల పరిధిలో రాష్ట్రంలోని మొత్తం ఓటర్లలో దాదాపు మూడో వంతు మంది ఉన్నారు. హైదరాబాద్‌లో 47.36 లక్షలు, మేడ్చల్‌లో 29.78 లక్షలు, రంగారెడ్డి లో 36.99 లక్షల ఓటర్లు ఉన్నట్లు అధికారులు తెలిపారు. అధిక జనసాంద్రత కారణంగా బీఎల్‌ఓలు (బూత్ లెవల్ ఆఫీసర్లు) ఇంటింటికీ వెళ్లి ఎన్యుమరేషన్ ఫారాలు అందజేయడం సవాలుగా మారింది.

బీఎల్‌ఓలు చెప్పిన వివరాల ప్రకారం, చాలా ప్రాంతాల్లో అడ్రస్ లు సరిగా లేకపోవడం, ఇళ్ళకు తాళాలు ఉండటం, కొంతమంది వేరే ప్రాంతాలకు మారిపోవడం గుర్తించారు. అపార్ట్మెంట్లు, గేటెడ్ కమ్యూనిటీలు లోపలికి రానివ్వడం లేదని కూడా తెలిపారు. దీంతో ఫారాలు అందజేయడం వెనుకబడింది.

ఓటర్లు ఫారాలు నింపడంలోనూ ఇబ్బంది పడుతున్నారు. ఫారాలు తెలుగులో మాత్రమే ముద్రించబడి ఉండడం, ఉర్దూ లేదా ఇంగ్లీష్ లో ఫారం లేకపోవడంతో కొందరు అసౌకర్యానికి గురవుతున్నారు. అధికారులు మాత్రం బీఎల్‌ఓల వద్ద ఇంగ్లీష్, హిందీ, ఉర్దూ డమ్మీ ఫారాలు ఉన్నాయని, వాటిని చూసుకుని తెలుగు ఫారం నింపుకోవచ్చని సూచించారు. అలాగే, బీఎల్‌ఓలు ఫారాలను నేరుగా ఓటర్లకు ఇవ్వకుండా స్థానిక రాజకీయ నాయకులు లేదా అపార్ట్మెంట్ సంఘాల నేతలకు ఇస్తున్నట్లు ఆరోపణలు ఉన్నాయి. అయితే, బీఎల్‌ఓలు ఈ విషయంలో సహకారం అందిస్తామని, ఫారాలు పూర్తి చేయడంలో ఏదైనా అనుమానముంటే తాము దగ్గరుండి నింపుతామని చెబుతున్నారు.

తెలంగాణ ప్రధాన ఎన్నికల అధికారి కార్యాలయం స్పందిస్తూ, సంబంధిత బీఎల్‌ఓలు, బీఎల్‌ఏలు ప్రజలకు అన్ని విధాలుగా సహాయం చేస్తారని తెలిపింది. మ్యాపింగ్ ప్రక్రియలో ఎలాంటి ఇబ్బంది లేదని, దేశంలో ఎక్కడైనా ఓటరుగా ఉన్నా దాన్ని అనుసంధానించవచ్చని వివరించింది. ఈ ప్రక్రియ రాష్ట్ర ఎన్నికల సంసిద్ధతలో కీలకమైన భాగం కావడంతో, కోర్ అర్బన్ ప్రాంతంలో త్వరగా పూర్తి చేసేందుకు అధికారులు ప్రయత్నిస్తున్నారు.