హైదరాబాద్ ట్రాఫిక్ నిర్వహణకు స్మార్ట్ కెమెరాలు, ఫ్లైఓవర్లు: వెస్ట్ జోన్ ACP

హైదరాబాద్ నగరంలో ట్రాఫిక్ నియంత్రణకు స్మార్ట్ సిగ్నలింగ్, స్మార్ట్ కెమెరాలను ఉపయోగిస్తున్నామని వెస్ట్ జోన్ ACP హరిప్రసాద్ తెలిపారు. కేబీఆర్ పార్క్ చుట్టూ అండర్‌పాస్‌లు, ఫ్లైఓవర్ల నిర్మాణం జరుగుతోందని, దీని పూర్తి తర్వాత పలు ప్రాంతాలకు సిగ్నల్ లేకుండా ప్రయాణించే వీలు కలుగుతుందని ఆయన చెప్పారు.

ఎన్టీఆర్ భవన్ నుంచి చెక్ పోస్ట్, సైబరాబాద్ వరకు అండర్‌పాస్ ద్వారా నేరుగా వెళ్లవచ్చని, అగ్రసేన ఐలాండ్, ఫిల్మ్ నగర్, షేక్పేట్ వైపు ఫ్లైఓవర్లు ఉండడంతో ఎక్కడా సిగ్నల్ వద్ద ఆగాల్సిన అవసరం రాదని ఆయన వివరించారు. నిర్మాణ సమయంలో ట్రాఫిక్ నిలిచిపోకుండా ఉండేందుకు సైనేజెస్, మీడియా, సోషల్ మీడియా ద్వారా ప్రత్యామ్నాయ మార్గాలు సూచిస్తామని, డైవర్షన్లను పాటించకపోతే సమయం, ఇంధనం వృధా అవుతుందని హెచ్చరించారు.

స్మార్ట్ కెమెరాల ద్వారా రెడ్ సిగ్నల్ జంప్, రాంగ్ సైడ్ డ్రైవింగ్ వంటి ఉల్లంఘనలను స్వయంచాలకంగా గుర్తించి ఇంటికే ఫైన్ పంపిస్తున్నామని ACP తెలిపారు. మాసబ్ ట్యాంక్, గోల్కొండ హోటల్ ఎదురుగా, ఆల్కజార్ భవనం వద్ద తరచూ నమోదయ్యే తప్పుడు దిశ ప్రయాణాలను కెమెరాలు రికార్డు చేస్తాయన్నారు.

వర్షాకాలంలో ముందస్తు సమాచారం మేరకు నీటి నిల్వలు ఏర్పడే ప్రదేశాల్లో మోటార్లు, హైడ్రా సిబ్బందిని ముందే ఏర్పాటు చేస్తామని హరిప్రసాద్ పేర్కొన్నారు. ఐటీసీ, ఏసీబీ కార్యాలయం, రాజ్భవన్, కేబీఆర్ పార్క్ సమీపంలో డ్రైనేజీలను శుభ్రం చేస్తామని, మైత్రి వనం దగ్గర ఇటీవల వేసిన అండర్‌గ్రౌండ్ పైప్‌లైన్ వల్ల వరద నీరు త్వరగా పోతుందని వివరించారు. పండగల సమయంలో కూడా రద్దీ లేకుండా ప్రత్యేక చర్యలు తీసుకుంటామని ఆయన తెలిపారు.