HYDRAA కమిషనర్ రంగనాథ్ హైదరాబాద్ వరద ప్రాంతాల పరిశీలన

HYDRAA కమిషనర్ రంగనాథ్ హైదరాబాద్‌లోని వరద ముంచెత్తిన ప్రాంతాలను పరిశీలించారు. మాదాపూర్, కొండాపూర్, మియాపూర్ ప్రాంతాల్లో ఆయన క్షేత్రస్థాయి పర్యటన చేశారు.

కొండాపూర్ నుంచి మొండికుంటకు చేరాల్సిన వరద నీరు ఆగిపోవడానికి మీనాక్షి టవర్స్ వద్ద బాక్స్ డ్రైన్లో అడ్డంకులు ఉండటమే కారణమని గుర్తించారు. కాలువ ఇరుకయ్యిందని కూడా తేలింది. వెంటనే పూడిక తొలగించి కాలువను చక్కబెట్టాలని ఆదేశించారు.

గచ్చిబౌలి ప్రధాన రహదారిలోని బయోడైవర్సిటీ పార్క్ పరిసరాలు నీట మునిగాయి. ఇందుకు కాజాగూడా చెరువు, మల్కం చెరువుకు వెళ్ళే ఇన్లెట్లు సక్రమంగా లేకపోవడమే కారణమని కమిషనర్ గుర్తించారు. రాయదుర్గం మెట్రో స్టేషన్ వద్ద నాలా మ్యాన్హోల్ పూడుకుపోవడంతో వరద నీరు నిలిచిందని, వెంటనే పరిష్కరించాలని సూచించారు.

ఈ పనులన్నీ రెండు రోజుల్లో పూర్తి చేయాలని కమిషనర్ ఆదేశించారు.