గంభీర్ కోచింగ్‌పై ఐస్ల్యాండ్ క్రికెట్ వ్యాఖ్యలు; ICC రెవెన్యూ పంపిణీపై విమర్శ

భారత క్రికెట్ జట్టు ప్రధాన కోచ్ గౌతమ్ గంభీర్ కోచింగ్ సామర్థ్యం సులువైనదేనని ఐస్ల్యాండ్ క్రికెట్ అసోసియేషన్ సోషల్ మీడియా ఖాతా ఎగతాళి చేసింది. ఫస్ట్‌పోస్ట్‌తో ఇచ్చిన ప్రత్యేక ఇంటర్వ్యూలో అసోసియేషన్ కార్యదర్శి డేవిడ్ కుక్ ఈ వ్యాఖ్యలను వివరించారు. అత్యంత ప్రతిభావంతులైన ఐపీఎల్ ఆటగాళ్లతో నిండిన జట్టుకు కోచ్‌గా ఉండటం పెద్ద కష్టం కాదని, ఎవరైనా గెలిపించగలరని ఆన్లైన్‌లో పేర్కొన్నామని, ఇది క్రికెట్‌లో సరదా కోణమని కుక్ తెలిపారు. 'మేం చిన్న దేశం. క్రికెట్‌లో వినోదం ముఖ్యం. మా ఉద్దేశం విమర్శించడం కాదు, ఆటను సరదాగా చూడటం' అని కుక్ అన్నారు. ఐస్ల్యాండ్ క్రికెట్ ట్విట్టర్ ఖాతా ఎనిమిదేళ్లుగా ఇలాంటి హాస్య, వ్యంగ్య ట్వీట్లతో ప్రపంచ క్రికెట్ అభిమానులను ఆకర్షిస్తోంది. అయితే కేవలం వ్యాఖ్యలకే పరిమితం కాకుండా ICC ఆదాయ పంపిణీ విషయంలో తీవ్ర అసంతృప్తి వ్యక్తం చేశారు. ప్రస్తుత ICC నిధుల నమూనాలో భారత్, ఆస్ట్రేలియా, ఇంగ్లండ్ వంటి దేశాలకే అత్యధిక వాటా లభిస్తోందని, అసోసియేట్ సభ్య దేశాలు, తమలాంటి చిన్న దేశాలు సున్నా ఫండింగ్ పొందుతున్నామని ఆయన ఆరోపించారు. ఎస్టోనియా లాంటి దేశాలు కూడా క్రౌడ్ ఫండింగ్ ద్వారా టోర్నీలకు వెళ్తున్నాయని ఉదాహరణగా చెప్పారు. ఐర్లాండ్, జింబాబ్వే, ఆఫ్ఘనిస్తాన్‌కు వరల్డ్ టెస్ట్ ఛాంపియన్షిప్‌లో చోటు ఇవ్వాలని కోరారు. ఐస్ల్యాండ్‌లో 400,000 మంది మాత్రమే జనాభా ఉన్నా, ఐదు క్లబ్ జట్లు, టీ20, 40 ఓవర్ల టోర్నీలతో క్రికెట్ ను అభివృద్ధి చేస్తున్నట్లు వివరించారు. త్వరలోనే వార్సాలో జరిగే యూరో కప్‌లో లిథువేనియా, లాట్వియా, పోలాండ్‌తో పోటీపడనున్నామని, తొలి ట్రోఫీ సాధించాలని ఆశిిస్తున్నట్లు కుక్ తెలిపారు. రెవెన్యూలో 0.1% కూడా ఇచ్చినా యువత, మహిళల క్రికెట్ అభివృద్ధికి చాలా సాయం అవుతుందని కోరారు.