సర్వే: 3-18 ఏళ్ల పిల్లల్లో 8.4% మధుమేహం, 12.4% అధిక బరువు

చెన్నైలోని ఇండియా డయాబెటిస్ రీసెర్చ్ ఫౌండేషన్ (IDRF) తాజా సర్వే వివరాలను వెల్లడించింది. దేశంలో 3 నుంచి 18 ఏళ్లలోపు పిల్లల్లో 8.4% మంది మధుమేహంతో బాధపడుతున్నారు. 12.4% మంది అధిక బరువుతో ఉన్నట్లు సర్వేలో తేలింది.

ఈ సంస్థ 2006లో 12 నుంచి 19 ఏళ్ల వయసున్న 1,080 మంది విద్యార్థులపై సర్వే నిర్వహించింది. 2023లో 954 మంది విద్యార్థులపై అదే రకమైన పరీక్షలు చేసింది. గత 17 ఏళ్లలో రక్తంలో చక్కెర స్థాయిలు 8 నుంచి 9 రెట్లు పెరిగినట్లు అధ్యయనంలో తేలింది. ప్రతి నలుగురు విద్యార్థుల్లో ఒకరి గ్లూకోజ్ స్థాయిలు అసాధారణంగా ఉన్నట్లు గుర్తించారు. బాలురతో పోలిస్తే బాలికల్లో ఈ ముప్పు ఎక్కువగా ఉందని అధ్యయనం తెలిపింది.

ఈ పరిస్థితికి జన్యుపరమైన కారణాలు, ఊబకాయం ఉన్న తల్లిదండ్రులు కూడా కారణమని నిపుణులు చెప్తున్నారు. ప్రాసెస్డ్ ఫుడ్, చక్కెర ఎక్కువగా ఉండే ఆహారం, శారీరక శ్రమ లేకపోవడం ప్రధాన కారణాలుగా పేర్కొన్నారు. పిల్లలు ఎక్కువసేపు స్కూల్లో ఉండటం, మొబైల్ ఫోన్లకు అతుక్కుపోవడం వల్ల ఆటలు తగ్గాయి. నిద్ర కూడా సరిగా లేదు.

తల్లిదండ్రులు టైప్ 1 మధుమేహం లక్షణాలను గుర్తించాలని వైద్యులు సూచిస్తున్నారు. అధిక దాహం, తరచూ మూత్ర విసర్జన, బరువు తగ్గడం, అలసట, దృష్టి సమస్యలు ముఖ్య లక్షణాలు. కొన్నిసార్లు వాంతులు, కడుపు నొప్పి, వాసనతో కూడిన శ్వాస కూడా కనిపిస్తుంది. ఇలాంటి లక్షణాలు కనిపిస్తే వెంటనే రక్త పరీక్షలు చేయించాలి. వైద్యుల సూచనలతో ఇన్సులిన్, ఆహార మార్పులతో సాధారణ జీవితం గడపవచ్చు.

లాన్సెట్ అధ్యయనం ప్రకారం దేశవ్యాప్తంగా 1.25 కోట్ల మంది చిన్నారులు ఊబకాయంతో బాధపడుతున్నారు. ఊబకాయం వల్ల మధుమేహం, గుండె జబ్బులు, కిడ్నీ వ్యాధులు, బీపీ, ఫ్యాటీ లివర్ వంటి సమస్యలు పెరుగుతున్నాయి. చిన్న వయసులోనే ఆరోగ్యకరమైన ఆహారం, వ్యాయామం, క్రమమైన దినచర్య అలవాటు చేయడం మేలని నిపుణులు చెప్తున్నారు. పిల్లల ఆహారం, ఆటపాటలపై తల్లిదండ్రులు శ్రద్ధ పెట్టాలని సూచించారు.