IIIT బాసరలో బ్రేక్‌ఫాస్ట్‌లో బొద్దింక: విద్యార్థుల నిరసన

బాసర (నిర్మల్ జిల్లా) లోని IIIT మెస్‌లో ఉదయం అల్పాహారంలో వడ్డించిన చపాతీ, ఆలూ కుర్మాలో బొద్దింక కనిపించడం కలకలం రేపింది. ఈ ఘటనతో విద్యార్థులు విస్మయం చెంది వెంటనే నిరసన తెలిపారు.

విద్యార్థుల కథనం ప్రకారం, గత సంవత్సరం నుంచి ఈ మెస్‌లో నాణ్యత లేని ఆహారం అందుతోంది. ఇంతకుముందు ఫుడ్ పాయిజనింగ్ కారణంగా కొందరు విద్యార్థులు ఆసుపత్రి పాలయ్యారు. తీవ్రమైన కడుపునొప్పి, వాంతులు వంటి సమస్యలు వచ్చాయని వారు చెబుతున్నారు. చాలాసార్లు తినలేక పస్తులు ఉన్నామని ఆవేదన వ్యక్తం చేశారు.

విశ్వవిద్యాలయ అధికారులు ఈ ఘటనపై దృష్టి పెట్టి ప్రాథమిక విచారణ ప్రారంభించారు. వాస్తవాలను నిర్ధారించేందుకు ఒక కమిటీని ఏర్పాటు చేశారు.

ఈ మెస్‌లో దాదాపు 9,000 మంది విద్యార్థులు భోజనం చేస్తున్నారు. ప్రస్తుతం క్యాటరింగ్ కాంట్రాక్ట్ గడువు ముగిసింది. కొత్తగా టెండర్లు వేయాలని విద్యార్థులు డిమాండ్ చేస్తున్నారు. సోషల్ మీడియా ద్వారా ముఖ్యమంత్రి రేవంత్ రెడ్డి, గవర్నర్, మంత్రులకు లిఖిత పూర్వకంగా ఫిర్యాదు చేసినట్లు తెలిపారు. నాణ్యమైన భోజనం అందించకపోతే మళ్లీ ధర్నా చేపడతామని హెచ్చరించారు. ప్రభుత్వం తక్షణం స్పందించి, కాంట్రాక్టర్‌పై చర్య తీసుకోవాలని డిమాండ్ చేస్తున్నారు.