ఐఐటి హైదరాబాద్‌లో దేశంలోనే తొలి న్యూక్లియర్ టెక్నాలజీ కోర్సు ప్రారంభం

ఐఐటి హైదరాబాద్‌లో భారతదేశంలోనే తొలిసారిగా న్యూక్లియర్ టెక్నాలజీ కోర్సు ప్రారంభమైంది. సంగారెడ్డి జిల్లా కంది మండలంలోని ఐఐటి హైదరాబాద్ క్యాంపస్‌లో ఈ మూడు నెలల కోర్సు మొదలైంది.

ఐఐటి హైదరాబాద్ ప్రొఫెసర్ భువనేశ్వర్ రామకృష్ణ మాట్లాడుతూ, ప్రస్తుతం భారతదేశ విద్యుత్ ఉత్పత్తిలో న్యూక్లియర్ వాటా 3% మాత్రమేనని, 2047 నాటికి 100 గిగావాట్లకు పెంచాలని ప్రధానమంత్రి ఆశయంగా చెప్పారని తెలిపారు. ఈ లక్ష్యానికి అవసరమైన నైపుణ్యం కలిగిన మానవ వనరులను సృష్టించడమే ఈ కోర్సు ఉద్దేశమని ఆయన వివరించారు.

B.Tech చేసిన విద్యార్థులు ఎవరైనా ఈ కోర్సులో చేరవచ్చు. ఎలక్ట్రికల్, మెకానికల్, సివిల్, ఫిజిక్స్ నేపథ్యం ఉన్నవారికి ప్రాధాన్యత ఉంటుందని, ప్రస్తుతానికి మూడు నెలల కోర్సు ప్రారంభించామని, రాబోయే ఏడాదిలో ఎం.టెక్ ప్రోగ్రామ్ కూడా ప్రారంభించాలని ప్రొఫెసర్ చెప్పారు.

న్యూక్లియర్ టెక్నాలజీ వల్ల రేడియేషన్ ప్రమాదాలపై స్పష్టత ఇస్తూ, భారతదేశంలో ఇప్పటివరకు ఏ అణు ప్రమాదం జరగలేదని, కఠిన భద్రతా నిబంధనలు ఉన్నాయని ప్రొఫెసర్ తెలిపారు. ఫ్రాన్స్‌లో న్యూక్లియర్ విద్యుత్ వాటా 67% దాకా ఉదాహరణగా చూపుతూ, భవిష్యత్తులో విద్యుత్ అవసరాలు భారీగా పెరగడంతో న్యూక్లియర్ రంగం కీలకమని ఆయన అన్నారు.