మంచిర్యాల: మహారాష్ట్ర నుంచి అక్రమంగా ధాన్యం రవాణా.. 6 లారీలు సీజ్

మంచిర్యాల జిల్లా రాపనపల్లి ప్రాణహిత అంతర్రాష్ట్ర చెక్పోస్ట్ వద్ద పోలీస్, రెవెన్యూ అధికారులు ఆరు వరి ధాన్యం లారీలను పట్టుకున్నారు. ఈ లారీలు మహారాష్ట్ర నుంచి తెలంగాణలోకి అక్రమంగా ప్రవేశించినట్లు గుర్తించారు.

లారీలు మధ్యప్రదేశ్ నుంచి టెండర్ ద్వారా రవాణా చేస్తున్నట్టు బిల్లులు చూపించినప్పటికీ, అన్ని లారీలు మహారాష్ట్రలోని కసరవెల్లి ప్రాంతానికి చెందిన ఒక వ్యక్తికి సంబంధించినవిగా అధికారులు గుర్తించారు. ఆరు లారీల్లో ఒకదాన్ని మాత్రమే కోటపల్లి పోలీస్ స్టేషన్‌కు తరలించగా, మిగిలిన ఐదింటిని చెన్నూరు మండలం లక్ష్మీపూర్ పెట్రోల్ బంక్ వద్ద, చింతపల్లి ప్రాంతాల్లో నిలిపి ఉంచినట్లు సమాచారం.

కేవలం ఒక లారీని మాత్రమే పోలీసులకు అప్పగించడంతో కేసును రాజకీయ పలుకుబడితో నీరుగార్చే ప్రయత్నం జరుగుతోందన్న ఆరోపణలు వినిపిస్తున్నాయి. గతంలో లక్ష్మీపూర్ సమీపంలో పట్టుబడిన ధాన్యం లారీని అధికారులు విడిచిపెట్టినట్లు కూడా ఆరోపణలు ఉన్నాయి. మహారాష్ట్రలో తక్కువ ధరకు కొనుగోలు చేసిన ధాన్యాన్ని తెలంగాణ రైతుల పేరుతో విక్రయిస్తున్నట్టు రైతు సంఘాలు చెబుతున్నాయి.

తమ ధాన్యం అమ్ముకోవడానికి రైతులు ఇబ్బందులు పడుతున్న నేపథ్యంలో ఈ అక్రమ రవాణా జరుగుతోందని రైతులు ఆరోపిస్తున్నారు. పూర్తిస్థాయి విచారణ జరిపించి బాధ్యులపై చర్యలు తీసుకోవాలని రైతు సంఘాలు డిమాండ్ చేశాయి. ఉన్నతాధికారులు దర్యాప్తు ప్రారంభించాలని రైతులు కోరుతున్నారు.