ఏపీలో 12 జిల్లాలకు IMD ఆరెంజ్ అలర్ట్ — మూడు రోజులు తీవ్ర వడగాలులు

ఆంధ్రప్రదేశ్‌లో తీవ్రమైన వడగాలులు కొనసాగుతున్నాయి. IMD మరో మూడు రోజుల పాటు 12 జిల్లాలకు ఆరెంజ్ అలర్ట్ జారీ చేసింది.

దక్షిణ కోస్తా జిల్లాలైన NTR, కృష్ణా, గుంటూరు, బాపట్ల, పల్నాడు, ప్రకాశం, నెల్లూరుతో పాటు పశ్చిమ గోదావరి, ఏలూరు, కోనసీమ, తూర్పు గోదావరి జిల్లాలకు ఆరెంజ్ అలర్ట్ ఇచ్చారు. కాకినాడ, అల్లూరి సీతారామరాజు, అనకాపల్లి, విశాఖపట్నం జిల్లాలకు యెల్లో అలర్ట్ జారీ చేశారు. విశాఖ, విజయనగరం, శ్రీకాకుళం, పార్వతీపురం మన్యం జిల్లాలకు తేమతో కూడిన వేడి వల్ల యెల్లో అలర్ట్ ఇచ్చారు.

గత 24 గంటల్లో నమోదైన ఉష్ణోగ్రతలు: జంగమహేశ్వరపురం 45°C, బాపట్ల 44.8°C, విజయవాడ 44.2°C, అమరావతి 44°C, కావలి 43.8°C, ఒంగోలు 43.3°C, నందిగామ 43.1°C. తిరుపతిలో గరిష్ట ఉష్ణోగ్రత 42.4°C నమోదైంది.

విశాఖ తుఫాన్ కేంద్రం సీనియర్ అధికారి జగన్నాథ్ కుమార్ మాట్లాడుతూ, రాయలసీమ ప్రాంతంలో సాధారణ గరిష్ట ఉష్ణోగ్రత 40°C పైన ఉంటుందని, అందువల్ల 5 డిగ్రీల విచలనం తక్కువగా ఉంటుందని, అక్కడ హీట్ వేవ్ డిక్లేర్ చేయలేదని తెలిపారు. రాయలసీమలో 45°C నమోదైతే హీట్ వేవ్ అలర్ట్ జారీ చేస్తామని ఆయన వివరించారు. రాబోయే 5 రోజులు రాయలసీమలో 41°C నుండి 44°C వరకు ఉష్ణోగ్రతలు ఉండే అవకాశం ఉందని తెలిపారు.

ఉత్తర కోస్తా జిల్లాల్లో రాబోయే మూడు రోజులు పొడి వాతావరణం, మెరుపులతో కూడిన dry thunderstorm ఉండే అవకాశం ఉందని IMD తెలిపింది. దక్షిణ కోస్తాలో నాలుగు రోజులు చిరుజల్లులు, ఉరుములు మెరుపులు కొనసాగవచ్చని, ఒకటి రెండు చోట్ల 50 నుండి 60 కి.మీ. వేగంతో ఈదురుగాలులు వీచే అవకాశం ఉందని తెలిపింది. మే 26 తర్వాత కేరళకు మాన్సూన్ చేరుకుంటుందని IMD అంచనా వేస్తోంది. అంతవరకు మరో మూడు రోజులు వడగాలుల వాతావరణం కొనసాగే అవకాశం ఉందని అధికారులు తెలిపారు.