16 జిల్లాలకు వర్ష హెచ్చరిక — 9,218 మెట్రిక్ టన్నుల ధాన్యం తడిసింది

వాతావరణ శాఖ రాష్ట్రంలో 16 జిల్లాలకు వర్ష హెచ్చరిక జారీ చేసింది. మరో రెండు రోజులు వర్షాలు కొనసాగే అవకాశం ఉందని అధికారులు తెలిపారు.

అకాల వర్షాల వల్ల రాష్ట్రంలో 9,218 మెట్రిక్ టన్నుల ధాన్యం తడిసిందని సివిల్ సప్లై శాఖ ప్రకటించింది. 18 జిల్లాల్లో తడిసిన ధాన్యంలో ఇప్పటివరకు 8,883 మెట్రిక్ టన్నులు సేకరించినట్టు అధికారులు చెప్పారు. మిగిలిన ధాన్యాన్ని కూడా మద్దతు ధరకే కొంటామని ప్రభుత్వం ప్రకటించింది.

భద్రాద్రి కొత్తగూడెం జిల్లా దమ్మపేట మండలంలో ఈదురు గాలులు పెద్ద నష్టం కలిగించాయి. విద్యుత్ స్తంభాలు విరిగిపడ్డాయి. రేకు షెడ్లు గాల్లో ఎగిరిపోయాయి. మామిడి తోటల్లో కాయలు రాలిపోవడంతో రైతులకు నష్టం వాటిల్లింది.

ఖమ్మం జాతీయ రహదారిపై భారీ చెట్లు నేల కొరిగాయి. దీంతో ట్రాఫిక్ నిలిచిపోయింది. పోలీసులు JCB సాయంతో చెట్లను తొలగించారు.

నిర్మల్ జిల్లా ఖానాపూర్, పెంబి మండలాల్లో ఉరుములు మెరుపులతో వర్షం పడింది. కొమరం భీం జిల్లా కాగజ్‌నగర్, కౌటాల మండలాల్లోనూ వానలు పడ్డాయి.

తూర్పు ఉత్తర జిల్లాల్లో వడగాలుల తీవ్రత ఉండే అవకాశం ఉందని వాతావరణ శాఖ అధికారులు హెచ్చరించారు. మిగిలిన జిల్లాల్లో గరిష్ట ఉష్ణోగ్రత 41 నుంచి 44 డిగ్రీల వరకు నమోదు అవుతుందని అంచనా వేశారు. గంటకు 40 నుంచి 50 కిలోమీటర్ల వేగంతో ఈదురు గాలులు వీచే అవకాశం ఉందని తెలిపారు.