ఈ ఏడాది తెలంగాణలో వర్షపాతం తగ్గే అవకాశం: ఐఎండీ

ఈ ఏడాది తెలంగాణలో వర్షపాతం సాధారణం కంటే కొంత తక్కువగా నమోదయ్యే అవకాశం ఉందని IMD హెచ్చరించింది. ఎల్‌నీనో ప్రభావమే ఇందుకు కారణమని శాఖ తెలిపింది.

మధ్య తెలంగాణ జిల్లాల్లో సాధారణం లేదా అంతకంటే ఎక్కువ వర్షపాతం కురిసే అవకాశం ఉంది. ఉత్తర, దక్షిణ జిల్లాల్లో మాత్రం వర్షపాతం తక్కువగా ఉండవచ్చని వాతావరణ శాఖ అంచనా వేసింది.

ఈ నేపథ్యంలో ఉద్యాన, వ్యవసాయ శాఖల అధికారులు రైతులకు సూచనలు చేశారు. తొలకరి జల్లులు పడగానే విత్తనాలు వేయొద్దని సూచించారు. కనీసం 60 నుంచి 75 మిల్లీమీటర్ల వర్షపాతం నమోదైన తర్వాతే విత్తనాలు నాటాలన్నారు.

నేలలో తేమ నిల్వ ఉండేలా పశువుల ఎరువు, వెర్మి కంపోస్ట్ వంటి సేంద్రియ ఎరువులు వాడాలని సూచించారు. సమగ్ర సస్య రక్షణ పద్ధతులు పాటిస్తే చీడపీడల బెడద తగ్గుతుందని చెప్పారు.

నీటి వినియోగం తక్కువగా ఉండే పంటల వైపు రైతులు మళ్లాలని నిపుణులు సూచిస్తున్నారు. వరి సాగుకు ఎకరాకు 60 లక్షల లీటర్ల నీరు అవసరం. అదే టమాటా పంటకు కేజీకి 800 లీటర్ల నీరు సరిపోతుందని వివరించారు.

మల్చింగ్, డ్రిప్ ఇరిగేషన్, ఎత్తైన బెడ్లు వంటి నీటి సంరక్షణ పద్ధతులు అమలు చేయాలని సూచించారు. మామిడి, జామ, సీతాఫలం తోటల్లో డ్రిప్ ఇరిగేషన్, కత్తరింపులు చేపట్టాలన్నారు. ఆయిల్ పామ్, అరటి, కొబ్బరి తోటల్లో మల్చింగ్ చేస్తే ఎండ ప్రభావం తగ్గుతుందని నిపుణులు తెలిపారు.