కేంద్ర ప్రభుత్వం విదేశీయుల రిజిస్ట్రేషన్ నిబంధనలు సవరించింది; 180 రోజుల గడువులోపే రిజిస్టర్ చేసుకోవాలి

భారతదేశంలో 180 రోజులకు మించి బస చేయాలనుకునే విదేశీ పౌరుల కోసం కేంద్ర ప్రభుత్వం ఇమిగ్రేషన్ ఫారనర్స్ రూల్స్‌ను సవరించింది. కొత్త నిబంధనలతో నోటిఫికేషన్ జారీ చేసింది.

గతంలో దేశంలోకి ప్రవేశించిన 180 రోజులు పూర్తయ్యాక 14 రోజుల వ్యవధిలో రిజిస్ట్రేషన్ చేసుకోవచ్చు. కానీ కొత్తగా తీసుకొచ్చిన మార్పుల ప్రకారం 180 రోజులు లేదా అంతకంటే తక్కువ వ్యవధి గల వీసాపై వచ్చి బస పొడిగించుకోవాలనుకునే వారు ఆ 180 రోజుల గడువు ముగియకముందే రిజిస్ట్రేషన్ పూర్తి చేయాలి.

180 రోజులకు మించిన వీసా ఉన్నా, ప్రతి బస 180 రోజులు మించకూడదనే షరతు ఉన్న విదేశీయులకు కూడా ఈ నిబంధన వర్తిస్తుంది. అత్యవసర పరిస్థితుల్లో మాత్రమే గడువు దాటిన తర్వాత రిజిస్ట్రేషన్‌కు అనుమతిస్తామని ప్రభుత్వం స్పష్టం చేసింది.