ఎరువులతో వస్తున్న 20 భారత నౌకలు హార్ముజ్ జలసంధి సురక్షితంగా దాటాయి

ఎరువుల ముడిసరుకులతో వస్తున్న భారత్‌కు చెందిన 20 నౌకలు హార్ముజ్ జలసంధిని దాటాయని కేంద్ర రసాయనాలు, ఎరువుల మంత్రిత్వ శాఖ తెలిపింది.

ఈ నౌకల్లో ఎనిమిది నౌకలు 3.32 లక్షల టన్నుల యూరియా, నాలుగు నౌకలు 2.57 లక్షల టన్నుల డీఏపీ, మూడు నౌకలు 1.11 లక్షల టన్నుల సల్ఫర్‌ను భారత్ పోర్టులకు తీసుకువస్తున్నాయి.

మరో ఐదు నౌకలు త్వరలో రానున్నాయని, ఒక్కో నౌకలో 25,000 టన్నుల అమ్మోనియా, 45,000 టన్నుల యూరియా ఉందని మంత్రిత్వ శాఖ వెల్లడించింది. ఈ సరుకులన్నీ ప్రణాళిక ప్రకారమే చేరుకుంటాయని పేర్కొంది.

కేంద్ర మంత్రి జేపి నడ్డా మాట్లాడుతూ, పశ్చిమాసియాలో ఘర్షణల కారణంగా ప్రపంచ సరఫరా వ్యవస్థ తీవ్రంగా దెబ్బతిన్నదని చెప్పారు. దీనివల్ల ఎరువుల ధరలు, రవాణా సమయం పెరిగాయన్నారు. అయితే, అంతర్జాతీయ ధరలు పెరిగినప్పటికీ ప్రభుత్వం రైతుల ప్రయోజనాలను కాపాడిందన్నారు. ఎరువుల శాఖ తీసుకున్న ముందస్తు చర్యలే ఇందుకు కారణమని వివరించారు.