దేశంలో తొలి స్వదేశీ బుల్లెట్ రైలు డిజైన్ సిద్ధం, బెంగళూరులో తయారీ

దేశంలోనే తొలిసారి పూర్తిగా స్వదేశీ సాంకేతిక పరిజ్ఞానంతో బుల్లెట్ రైలు తయారవుతోంది. బెంగళూరులోని భారత్ ఎర్త్ మోవర్స్ లిమిటెడ్ (BEML) కేంద్రంలో ఈ రైలు తయారీ ప్రక్రియ కొనసాగుతోంది. రైలు డిజైన్ సిద్ధమైంది.

ఈ రైలును ముంబై–అహ్మదాబాద్ హై స్పీడ్ కారిడార్ కోసం ప్రత్యేకంగా రూపొందిస్తున్నారు. పరీక్షల సమయంలో గంటకు గరిష్ఠంగా 280 కిలోమీటర్ల వేగం సాధించేలా డిజైన్ చేశారు. సాధారణ సర్వీసుల్లో గంటకు 249 కిలోమీటర్ల వేగంతో నడపాలని ప్రణాళిక ఉంది.

రైలు పొడవు 202 మీటర్లు. మొత్తం ఎనిమిది కోచులు ఉంటాయి. ఇందులో నాలుగు మోటార్ కోచులు, నాలుగు ట్రైలర్ కోచులు ఉంటాయి. ఏడు కోచులు స్టాండర్డ్ క్లాస్ కాగా, ఒక కోచ్ ఎగ్జిక్యూటివ్ క్లాస్. స్టాండర్డ్ క్లాస్‌లో 3+2 సీటింగ్, ఎగ్జిక్యూటివ్ క్లాస్‌లో 2+2 సీటింగ్ ఏర్పాటు చేస్తున్నారు.

ఈ రైలులో మొత్తం 557 మంది ప్రయాణించవచ్చు. దివ్యాంగులు, కదలికల సామర్థ్యం తగ్గిన ప్రయాణికుల కోసం ప్రత్యేక సీట్లు ఏర్పాటు చేస్తున్నారు. ప్రతి వరుసలో విశాలమైన కిటికీలు, సౌకర్యవంతమైన సీట్లు, ఎక్కువ లెగ్ రూమ్ ఉంటాయి. లగేజీ కోసం ప్రత్యేక ఏర్పాట్లు కూడా ఉంటాయి.

ప్రయాణికుల సౌకర్యం కోసం మొబైల్ ఫోన్లు, ల్యాప్‌టాప్‌లకు వ్యక్తిగత పవర్ అవుట్‌లెట్లు అందుబాటులో ఉంటాయి. కోచుల మధ్య ప్రయాణికులు సులభంగా వెళ్లేందుకు సీల్డ్ గ్యాంగ్‌వే ఉంటుంది. ఆధునిక బయో డైజెస్టర్ టాయిలెట్లు, ఏడాది పొడవునా అనుకూల ఉష్ణోగ్రతను నిర్వహించే ఎయిర్ కండిషనింగ్ వ్యవస్థ బుల్లెట్ రైలులో ఉంటాయి. అవసరమైతే రెండు ఎనిమిది కోచుల రైళ్లను కలిపి 16 కోచుల రైలుగా నడిపే సదుపాయం కూడా ఉంది.