స్టాచ్యూ ఆఫ్ యూనిటీ సమీపంలో దేశంలోనే తొలి రైన్ ఫారెస్ట్, అక్టోబర్ 31న ప్రారంభం

గుజరాత్‌లోని నర్మదా జిల్లా ఏక్తా నగర్‌లో దేశంలోనే మొదటి రైన్ ఫారెస్ట్‌ను గుజరాత్ ప్రభుత్వం ఏర్పాటు చేసింది. ప్రపంచంలోనే అత్యంత ఎత్తైన విగ్రహం స్టాచ్యూ ఆఫ్ యూనిటీ సమీపంలో ఈ ప్రాజెక్టు ఉంది. పర్యాటకులను ఆకర్షించే లక్ష్యంతో ఈ నిర్ణయం తీసుకున్నట్లు అధికారులు తెలిపారు.

12 ఎకరాల విస్తీర్ణంలో ఈ రైన్ ఫారెస్ట్‌ను అభివృద్ధి చేశారు. దీని కోసం దాదాపు ₹12 కోట్లు ఖర్చు చేసినట్లు ప్రభుత్వం పేర్కొంది. అడవిలో ఏడాది పొడవునా నిజమైన వర్షం అనుభూతి కలిగేలా 20 ప్రత్యేక రైన్ గన్ టవర్లను ఏర్పాటు చేశారు.

బబుల్ ఫౌంటైన్లు, జలపాతాలు, వివిధ రాష్ట్రాలకు చెందిన వృక్ష జాతులు ఇక్కడ ఉన్నాయి. ఈ ప్రాజెక్టులో ప్రధాన ఆకర్షణ స్కై వాక్. ఇందులో 35 మిల్లీమీటర్ల మందం ఉన్న కొరియన్ గ్లాస్ ప్యానెళ్లను అమర్చారు. ఈ ప్యానెళ్ల సంఖ్య 132. ఈ తరహా డిజైన్ కలిగిన ప్రపంచంలోనే మొదటి స్కై వాక్ ఇదేనని ప్రాజెక్టు నిర్వాహకులు చెప్తున్నారు.

అక్టోబర్ 31న జాతీయ ఐక్యతా దినోత్సవం సందర్భంగా ప్రధాని నరేంద్ర మోదీ ఈ రైన్ ఫారెస్ట్‌ను అధికారికంగా ప్రారంభించనున్నారు. ప్రారంభోత్సవం కోసం అధికారులు ప్రత్యేక ఏర్పాట్లు చేస్తున్నారు. వేడుకల్లో దేశంలోని వివిధ రాష్ట్రాల నుంచి 8 వేల మందికి పైగా కళాకారులు తమ రాష్ట్రాల సంస్కృతి, సంప్రదాయాలను ప్రదర్శించనున్నారు.