ఢిల్లీ-ఎన్సీఆర్లో కల్తీ పనీర్, పాల ఉత్పత్తుల సరఫరా ముఠా బయటపడింది

దేశ రాజధాని ఢిల్లీ, ఎన్సీఆర్ ప్రాంతాల్లో రోజూ లక్షల మంది తాము కొనుగోలు చేస్తున్న పనీర్, పాలు, ఖోయా ఏ పదార్థాలతో తయారయ్యాయో తెలియకుండా వినియోగిస్తున్నారు. ఇండియా టుడే నిర్వహించిన అండర్‌కవర్ దర్యాప్తులో ఈ కల్తీ డెయిరీ ఉత్పత్తుల సరఫరా చేస్తున్న ఓ భారీ ముఠా బయటపడింది. ఈ ముఠా హర్యానాలోని మేవాత్ ప్రాంతంలోని అక్రమ కర్మాగారాల నుంచి పామ్ ఆయిల్, మిల్క్ పౌడర్, సోయాబీన్ ఉత్పత్తులతో తయారుచేసిన నకిలీ పనీర్, ఖోయా, పాలను ఢిల్లీ-ఎన్సీఆర్ మొత్తం సరఫరా చేస్తోంది. ఇండియా టుడే బృందం ఫిరోజ్‌పూర్ జిర్కాలోని కరీ కలానా గ్రామంలో బల్క్ కొనుగోలుదారులుగా నటిస్తూ సప్లయర్ ముస్తఫాను కలిసింది. అతడు పనీర్ తయారీలో సోయాబీన్, మిల్క్ పౌడర్, రిఫైండ్ ఆయిల్ వాడకాన్ని బహిరంగంగా అంగీకరించాడు. ఈ పదార్థాల మిశ్రమం బట్టి పనీర్ ధర, నాణ్యత మారుతాయని వివరించాడు. గ్రామ సర్పంచ్ ఆజమ్ ఖాన్ నివాసంలోనే నకిలీ పనీర్ తయారీ కేంద్రం నడుస్తున్నట్లు దర్యాప్తులో వెల్లడైంది. ఈ కర్మాగారాలు డ్రమ్ములు, వాట్లలో పారిశ్రామిక స్థాయిలో కల్తీ పనీర్ ఉత్పత్తి చేస్తున్నాయి. ఇవి నిజమైన పనీర్‌కు దాదాపు పోలి ఉండేలా తయారుచేయడంతో సామాన్యులు గుర్తించడం అసాధ్యంగా మారింది. ఈ కల్తీ సరఫరా వల్ల లక్షల మంది ఆరోగ్యానికి ప్రమాదం ఏర్పడిందని, ఆహార భద్రతా నియంత్రణ సంస్థలు ఎందుకు చర్యలు తీసుకోవడం లేదన్న ప్రశ్నలు తలెత్తుతున్నాయి. మేవాత్ నుంచి ఢిల్లీకి 130 కిలోమీటర్ల దూరంలో ఉన్న ఈ అక్రమ యూనిట్లు నిత్యం టన్నుల కొద్దీ కల్తీ ఉత్పత్తులను సరఫరా చేస్తున్నాయి. ఇండియా టుడే కెమెరాలకు చిక్కిన ఈ దృశ్యాలు ఆహార పదార్థాల నాణ్యతపై తీవ్ర ప్రశ్నలను లేవనెత్తాయి. మీరు తినే పనీర్‌లో ఎంత శాతం నిజమైన పాల ఉత్పత్తి ఉంటుందనేది ఇప్పుడు పెద్ద సందేహంగా మారింది.