భారత్ మొత్తం అప్పు రూ.375 లక్షల కోట్లు, జీడీపీని మించిపోయింది: జీవీ రెడ్డి

భారత ఆర్థిక స్థితిపై జర్నలిస్టు జీవీ రెడ్డి విశ్లేషణాత్మక వ్యాఖ్యలు చేశారు. దేశం మొత్తం అప్పులు జీడీపీని మించిపోయాయని ఆయన అన్నారు.

కేంద్ర ప్రభుత్వం అప్పు సుమారు రూ.250 లక్షల కోట్లు కాగా, రాష్ట్రాల అప్పులు మరో రూ.125 లక్షల కోట్లు ఉన్నాయని తెలిపారు. మొత్తం రూ.375 లక్షల కోట్ల అప్పు ఉండగా, జీడీపీ రూ.350 లక్షల కోట్లుగా ఉన్నట్టు చెప్పారు. ఈ లెక్కన అప్పుల నిష్పత్తి (డెట్-టు-జీడీపీ) 110 శాతానికి చేరిందని వివరించారు.

ఈ అప్పులో 20 శాతం విదేశీ మూలాల నుంచి తీసుకున్నవేనని, వాటిని తిరిగి డాలర్లలో చెల్లించాలని, దీంతో విదేశీ మారకం మార్పుల ప్రభావం ఉంటుందని ఆయన అన్నారు.

ఎలక్ట్రానిక్స్ దిగుమతుల విషయంలో ఏటా 100 నుంచి 110 బిలియన్ డాలర్ల విలువైన వస్తువులు దిగుమతి అవుతున్నాయని, వీటిని దేశీయంగా తయారు చేయగలిగితే 80 నుంచి 90 బిలియన్ డాలర్లు ఆదా చేయవచ్చని జీవీ రెడ్డి అభిప్రాయపడ్డారు.

ప్రస్తుతం స్విగ్గీ, జొమాటో, ఉబర్ వంటి కంపెనీలు తక్కువ ఆదాయ వృద్ధి అవకాశం ఉన్న ఉద్యోగాలను సృష్టిస్తున్నాయని, నాణ్యమైన ఉత్పాదక ఉద్యోగాల కోసం వ్యవస్థాగత మార్పులు అవసరమని ఆయన సూచించారు.