రోడ్డుపై మైలు రాళ్ల రంగులు ఏం చెప్తాయి?

భారత్‌లో రోడ్ల పక్కన కనిపించే మైలు రాళ్లపై వేర్వేరు రంగులు ఉంటాయి. ఈ రంగులు మీరు ఏ రకమైన రహదారిపై ప్రయాణిస్తున్నారో చెప్తాయి.

మైలురాయి పైభాగం పసుపు రంగులో ఉంటే అది జాతీయ రహదారి (National Highway). ఈ రోడ్లను కేంద్ర ప్రభుత్వ పరిధిలోని NHAI నిర్మించి నిర్వహిస్తుంది. ఇవి రాష్ట్రాలను, ప్రధాన నగరాలను, నౌకాశ్రయాలను అనుసంధానిస్తాయి.

మైలురాయి పైభాగం ఆకుపచ్చగా ఉంటే అది రాష్ట్ర రహదారి (State Highway). ఆయా రాష్ట్ర ప్రభుత్వాలు వీటిని నిర్మించి నిర్వహిస్తాయి. ఇవి జిల్లాలను, ప్రధాన నగరాలను రాజధానితో లేదా జాతీయ రహదారులతో కలుపుతాయి.

మైలురాయి పైభాగం నల్లగా లేదా ముదురు నీలంగా ఉంటే అది జిల్లా రహదారి (District Road). జిల్లా పరిపాలన, కార్పొరేషన్లు లేదా మున్సిపాలిటీలు వీటిని నిర్వహిస్తాయి.

మైలురాయి పైభాగం నారింజ రంగులో ఉంటే అది గ్రామీణ రహదారి (Rural Road). వీటిని ప్రధాన మంత్రి గ్రామ సడక్ యోజన పథకం కింద నిర్మిస్తారు. గ్రామాలను ప్రధాన రహదారులతో అనుసంధానించడం ఈ రోడ్ల లక్ష్యం.

ప్రతి మైలురాయి కింది భాగం మాత్రం తెలుపు రంగులోనే ఉంటుంది. రాత్రి వేళ వాహనాల లైట్ పడినప్పుడు ఈ తెలుపు రంగు స్పష్టంగా కనిపించి డ్రైవర్లకు దూరం నుంచే మైలురాయిని గుర్తుపట్టేలా చేస్తుంది.