రావణ్ కేసులో ఇంద్రసేనా చౌదరి, గమనలకు మళ్లీ పోలీసుల నోటీసులు

రావణ్ కేసు దర్యాప్తులో భాగంగా ఇంద్రసేనా చౌదరి, గమనలకు పోలీసులు మరోసారి విచారణకు హాజరుకావాలని నోటీసులు జారీ చేశారు. శుక్రవారం జరిగిన రెండో విడత విచారణలో కీలక ప్రశ్నలకు వీరు సరైన సమాధానాలు ఇవ్వకపోవడంతో దర్యాప్తు అధికారి హాజరుకావాలని ఆదేశించారు.

పెనమలూరు పోలీస్ స్టేషన్‌లో శుక్రవారం ఉదయం నుంచి రాత్రి 8:30 వరకు జరిగిన విచారణలో దర్యాప్తు అధికారి ధర్మేంద్ర ఇంద్రసేనా చౌదరి, గమనలను ప్రశ్నించారు. ఈ సందర్భంగా రావణ్ (బచ్చలకూరి జోసెఫ్)తో వారికి ఉన్న పరిచయం, ఆర్థిక లావాదేవీలు, యూట్యూబ్ ఛానళ్ల నిర్వహణ, నిధుల ప్రవాహం వంటి అంశాలపై పలు ప్రశ్నలు సంధించారు. వీరి బ్యాంకు స్టేట్‌మెంట్లను సేకరించి ప్రతి లావాదేవీ గురించి అడిగినా, సరైన సమాధానాలు రాలేదు.

విచారణ మధ్యలో పోలీసులు వీరిని మంగళగిరిలోని ఫారెన్సిక్ ల్యాబ్‌కు తీసుకెళ్లి, సీజ్ చేసిన ఫోన్లను అన్‌లాక్ చేయించారు. అప్‌లోడ్ చేసిన వీడియోల సంఖ్య, విద్వేషపూరిత కంటెంట్, స్క్రిప్ట్ తయారీలో ఎవరి పాత్ర అనే విషయాల్లోనూ స్పష్టత లేకపోవడంతో పోలీసులు తీవ్ర అసంతృప్తి వ్యక్తం చేశారు.

గమనను అనంతరం పెనమలూరు స్టేషన్‌లో, ఇంద్రసేనను గన్నవరంలో విడిగా ప్రశ్నించారు. కీలక ప్రశ్నలకు సమాధానాలు రాకపోవడంతో నేడు మళ్లీ హాజరుకావాలని నోటీసులు ఇచ్చారు. వీరి వాంగ్మూలం దర్యాప్తును మరింత ముందుకు తీసుకెళ్లడంలో సహాయపడుతుందని పోలీసులు భావిస్తున్నారు.