గుంటూరు: అత్తింటికే కన్నం వేసిన అల్లుడు, 70 గ్రాముల బంగారం అపహరణ

గుంటూరు జిల్లా కొల్లూరు మండలం దోనపూడికి చెందిన అయ్యంకి పసిగి తన అత్త ఇంట్లో చోరీకి పాల్పడ్డాడు. భార్య శిరీషతో తరచూ గొడవలు జరుగుతుండటం, ఆమె పుట్టింటికి వెళ్లి తిరిగి రాకపోవడంతో పసిగి కక్ష పెంచుకున్నాడు.

తన భార్యకు అత్తే కారణమని భావించిన నిందితుడు, ఇంట్లో ఎవరూ లేని సమయంలో తలుపు తాళాలు పగలగొట్టి లోపలికి ప్రవేశించాడు. లాకర్లో ఉన్న 7 లక్షల రూపాయల విలువైన 70 గ్రాముల బంగారు ఆభరణాలను అపహరించాడు.

బాధితులు పోలీసులను ఆశ్రయించగా, దర్యాప్తు చేపట్టిన పోలీసులు నిందితుడిని అదుపులోకి తీసుకున్నారు. అతని వద్ద నుంచి చోరీకి గురైన మొత్తం బంగారాన్ని స్వాధీనం చేసుకున్నారు. కేసు నమోదు చేసి దర్యాప్తు కొనసాగిస్తున్నారు.