తెలంగాణ కేబినెట్ నిర్ణయాలు: ధరణి, భూభారతి లావాదేవీలపై SIT విచారణ; కరువు చర్యల ప్రకటన

ముఖ్యమంత్రి రేవంత్ రెడ్డి అధ్యక్షతన జరిగిన తెలంగాణ కేబినెట్ సమావేశంలో పలు కీలక నిర్ణయాలు తీసుకున్నారు. గత ప్రభుత్వ హయాంలో జరిగిన ధరణి, భూభారతి లావాదేవీలపై సమగ్ర విచారణ కోసం ప్రత్యేక దర్యాప్తు బృందం (SIT) ఏర్పాటు చేయాలని మంత్రివర్గం నిర్ణయించింది.

రాష్ట్ర మంత్రి పొంగులేటి శ్రీనివాస్ రెడ్డి ఈ మేరకు వివరాలు వెల్లడించారు. ధరణి పోర్టల్ ఏర్పడిన నాటి నుంచి ఇప్పటి భూభారతి వరకు అన్ని లావాదేవీలను ఈ SIT పరిశీలిస్తుందని ఆయన తెలిపారు.

రాష్ట్రంలో వర్షాభావ పరిస్థితులపై కూడా కేబినెట్ సుదీర్ఘంగా చర్చించింది. శాస్త్రవేత్తల హెచ్చరికల ప్రకారం ఎల్‌నినో ప్రభావం దక్షిణాది రాష్ట్రాలపై ఎక్కువగా ఉంటుందని, జూన్ 17 నుంచి జూలై 17 వరకు తెలంగాణలో ఏ జిల్లాలోనూ 30-35% కంటే ఎక్కువ వర్షపాతం నమోదు కాలేదని సమావేశంలో ప్రస్తావించారు. ఈ నేపథ్యంలో రైతులు వ్యవసాయ శాఖ సూచనలు పాటించాలని ప్రభుత్వం కోరింది.

కరువు తీవ్రతను ఎదుర్కొనేందుకు తక్షణ చర్యల్లో భాగంగా, ప్రతి ఉమ్మడి జిల్లాకు ఇంచార్జీ మంత్రితో పాటు ఒక సీనియర్ ఐఏఎస్ అధికారిని నియమించాలని నిర్ణయించారు. ఆయా జిల్లాలకు చెందిన అన్ని రాజకీయ పార్టీల ప్రజాప్రతినిధులు, శాస్త్రవేత్తలు, వ్యవసాయ నిపుణులతో చర్చించి భవిష్యత్ కార్యాచరణపై నివేదిక తీసుకురావాలని ఆదేశించారు.

తాగునీరు, విద్యుత్ సరఫరాకు అత్యధిక ప్రాధాన్యత ఇవ్వాలని కేబినెట్ నిర్ణయించింది. ఎంత ఖర్చైనా విద్యుత్‌కు అంతరాయం కలగకుండా చర్యలు తీసుకోవాలని స్పష్టం చేసింది. 10 ఉమ్మడి జిల్లాల నుంచి నివేదికలు వచ్చిన అనంతరం, ముఖ్యమంత్రి సమక్షంలో సమగ్ర ప్రణాళిక రూపొందించి కేంద్ర ప్రభుత్వానికి కరువు నివేదిక పంపాలని, కేంద్ర బృందాలను రాష్ట్రానికి ఆహ్వానించాలని కూడా నిర్ణయించినట్లు మంత్రి పొంగులేటి తెలిపారు.