వరంగల్‌లో భారీ వర్షం.. రోడ్లపై నీరు, రైతుల ప్రత్యేక పూజలు

వరంగల్‌ నగరంలో భారీ వర్షం కురిసింది. దీంతో పలు ప్రాంతాల్లో రోడ్లపై నీరు చేరింది.

హనుమకొండ బస్‌స్టాండ్, రామనగర్, భవానీ నగర్, సుధానగర్, హనుమకొండ చౌరస్తా తదితర ప్రాంతాల్లో మోకాలి లోతు వరకు నీరు నిలిచింది. ఆఫీసులు, స్కూళ్లకు వెళ్లే ప్రయాణికులు తీవ్ర ఇబ్బందులు ఎదుర్కొన్నారు. కొంతమంది సైకిల్‌పై కూడా ప్రయాణించారు.

స్థానికులు మాట్లాడుతూ, రోడ్డుకు ఇరువైపులా డ్రైనేజీ వ్యవస్థ సరిగా లేకపోవడం వల్లే ప్రతిసారీ ఇలాంటి సమస్య ఎదురవుతోందని చెప్పారు. మెరుగైన డ్రైనేజీ ఏర్పాటు చేస్తేనే ఈ ఇబ్బంది తొలగుతుందని అభిప్రాయపడ్డారు.

నగరంలో వర్షం కురుస్తుండగా, పరిసర గ్రామాల్లో మాత్రం వర్షాలు లేకపోవడంతో రైతులు దేవుళ్లకు ప్రత్యేక పూజలు, జలాభిషేకాలు చేశారు. కప్పతల్లి ఆటలాడించి వర్షాలు కురిసేలా చూడాలని ప్రార్థనలు జరిపారు. నాట్ల సీజన్ పూర్తయ్యే సమయంలో వర్షాలు లేకపోతే పంటలు దెబ్బతింటాయని రైతులు ఆందోళన చెందుతున్నారు.