రామగిరి బంగారు గనుల పునరుద్ధరణకు ప్రభుత్వం సన్నాహాలు; టెండర్లు త్వరలో

శ్రీ సత్యసాయి జిల్లాలోని రామగిరి బంగారు గనులను తిరిగి ప్రారంభించేందుకు ఆంధ్రప్రదేశ్ ప్రభుత్వం చర్యలు చేపట్టింది. జియోలాజికల్ సర్వే ఆఫ్ ఇండియా (GSI) సర్వేలో ఇక్కడ టన్ను మట్టికి 3.6 నుంచి 6 గ్రాముల వరకు బంగారం ఉన్నట్లు నివేదిక వచ్చింది. మంత్రి కొల్లు రవీంద్ర ఈ నెలలో గనులను సందర్శించి, త్వరలో టెండర్లు పిలుస్తామని ప్రకటించారు.

రామగిరి గనులకు 100 ఏళ్ల చరిత్ర ఉంది. బ్రిటిష్ కాలంలో తవ్వకాలు ప్రారంభమై, స్వాతంత్య్రం తర్వాత కొన్నేళ్లపాటు మూతపడ్డాయి. 1973లో కేంద్ర ప్రభుత్వ రంగ సంస్థ భారత్ గోల్డ్ మైన్స్ లిమిటెడ్ (BGML)కు 416 ఎకరాల్లో మైనింగ్ లీజు ఇవ్వగా, 2001 వరకు బంగారం ఉత్పత్తి కొనసాగింది. అప్పట్లో బంగారం ధర తక్కువగా ఉండటం, ఉత్పత్తి ఖర్చు ఎక్కువైన కారణంగా BGML గనులను మూసివేసింది.

గనులు మూతపడినా, స్థానిక కార్మికులు ఆ ప్రాంతాన్ని విడిచిపెట్టలేదు. అక్కడ మిగిలిన మట్టి దిబ్బలను కడిగి బంగారు రేణువులను ఏరుకుని, సమీపంలోని ధర్మవరంలో అమ్ముకుంటూ జీవనం సాగిస్తున్నారు.

గత YSRCP ప్రభుత్వ హయాంలో గని యంత్రాలు, మట్టి తరలింపుపై ఆరోపణలు వచ్చాయి. స్థానిక వైయస్ఆర్సీపీ నేతలు 1000కు పైగా టిప్పర్ల మట్టిని తరలించుకుపోయి లబ్ది పొందారని విమర్శలు ఉన్నాయి. స్థానిక ఎమ్మెల్యే పరిటాల సునీత ఈ ఆరోపణలపై సమగ్ర విచారణ జరిపించాలని ప్రభుత్వాన్ని కోరారు. ఆమె 15 ఏళ్లుగా గనుల పునరుద్ధరణ కోసం కృషి చేస్తున్నారు.

మంత్రి కొల్లు రవీంద్ర మాట్లాడుతూ, గతంలో ఎవరైనా డంప్ తరలించి ఉంటే బాధ్యులపై చర్యలు తీసుకుంటామని హామీ ఇచ్చారు. జొన్నగిరి గనితో పోలిస్తే రామగిరిలో బంగారు లభ్యత ఎక్కువగా ఉండటంతో ఇది ఆర్థికంగా లాభదాయకంగా ఉంటుందని చెప్పారు. మూడు బ్లాక్‌లుగా విభజించి వేలం నిర్వహించే ఏర్పాట్లు జరుగుతున్నాయి. రామగిరి గనులు తిరిగి ప్రారంభమైతే స్థానికులకు ఉద్యోగ, ఉపాధి అవకాశాలు లభించనున్నాయి.