యంగ్ ఇండియా స్కిల్ యూనివర్సిటీ డిసెంబర్ నాటికి సిద్ధం: మంత్రి వివేక్ వెంకటస్వామి

యంగ్ ఇండియా స్కిల్ యూనివర్సిటీ నిర్మాణ పనులు డిసెంబర్ నాటికి పూర్తవుతాయని కార్మిక శాఖ మంత్రి వివేక్ వెంకటస్వామి తెలిపారు. రంగారెడ్డి జిల్లా కందుకూరులో 54 ఎకరాల్లో ఈ యూనివర్సిటీ నిర్మిస్తున్నారు.

ఈ యూనివర్సిటీలో డిజిటల్, ఫార్మా, హెల్త్‌కేర్ తదితర 17 రకాల కోర్సులు అందుబాటులో ఉంటాయి. కొన్ని కోర్సులు 5-6 నెలలు, డిప్లొమా కోర్సులు ఏడాది, డిగ్రీ కోర్సులు మూడేళ్ల వ్యవధి ఉంటాయి. విద్యార్థినులకు ప్రత్యేక హాస్టల్ సదుపాయంతో పాటు తరగతి గదులు, ల్యాబ్‌లు, సెమినార్ హాళ్లు అందుబాటులో ఉంటాయని మంత్రి వివరించారు.

2026 విద్యా సంవత్సరంలో తొలి ఏడాది 2,500 మంది విద్యార్థులకు ప్రవేశాలు కల్పించనున్నారు. ప్రస్తుతం ఏటీసీలు, టాస్క్ వంటి సంస్థల ద్వారా యువతకు శిక్షణ ఇస్తూ ఉద్యోగ అవకాశాలు మెరుగుపరుస్తున్నట్లు చెప్పారు. టాంకామ్ సహకారంతో జర్మనీ భాష నేర్పించి విదేశాల్లో లక్షల్లో జీతం వచ్చే ఉద్యోగాలు చూపిస్తున్నామని తెలిపారు.