ఎల్ నినోపై తెలంగాణ క్యాబినెట్ సమావేశం: తాగునీరు, విద్యుత్ సరఫరా నిరంతరాయం

తెలంగాణ ముఖ్యమంత్రి రేవంత్ రెడ్డి అధ్యక్షతన మంత్రివర్గ సమావేశం జరిగింది. ఈ సమావేశంలో రాష్ట్రంలో ఎల్ నినో ప్రభావంపై సమీక్షించారు. వర్షాభావ పరిస్థితుల నేపథ్యంలో పలు కీలక నిర్ణయాలు తీసుకున్నారు.

మంత్రి పొంగులేటి శ్రీనివాస్ రెడ్డి వివరాల ప్రకారం, ఎల్ నినో వల్ల రాష్ట్రంలో 30 శాతం వర్షపాతం కూడా నమోదు కాలేదు. ఈ పరిస్థితిని ఎదుర్కొనేందుకు ఈ నెల 20 వ తేదీన జిల్లాల వారీగా ఇన్ఛార్జ్ మంత్రుల నేతృత్వంలో సమావేశాలు నిర్వహించనున్నారు. ఆ తర్వాత వర్షాభావం పర్యవేక్షణ నివేదికలను సీఎం రేవంత్ రెడ్డి సమీక్షించి, కేంద్రానికి పూర్తి నివేదిక పంపి సహాయం కోరతారు.

తాగునీరు, విద్యుత్ సరఫరాకు అంతరాయం లేకుండా జిల్లా కలెక్టర్లు చర్యలు తీసుకోవాలని మంత్రివర్గం ఆదేశించింది. ప్రజల ఫిర్యాదులపై వెంటనే స్పందించాలని సూచించారు. రైతులు ఆరుతడి పంటలు సాగు చేసేలా రాష్ట్ర ప్రణాళిక సంఘం ఉపాధ్యక్షుడు చిన్నారెడ్డి నేతృత్వంలో అవగాహన కార్యక్రమాలు నిర్వహిస్తారు.

ఎల్ నినో నష్టాల అంచనాకు కేంద్రం నుంచి ప్రత్యేక బృందాన్ని రప్పించాలని, ప్రత్యామ్నాయ ప్రణాళికల అమలుకు కేంద్ర ఆర్థిక సహాయం కావాలని మంత్రిమండలి తీర్మానించింది. ప్రజాభవన్ నుంచి టోల్ ఫ్రీ హెల్ప్ లైన్ ఏర్పాటు చేశారు. ఇదే సమావేశంలో మున్సిపాలిటీలు, కార్పొరేషన్లలో ట్రాన్స్ జెండర్ కో-ఆప్షన్ సభ్యుల నియామకం, చిన్న కాళేశ్వరం ప్రాజెక్టు డీపీఆర్ తయారీ, జగిత్యాల డిగ్రీ కాలేజీకి 29 పోస్టుల మంజూరుకు కూడా ఆమోదం తెలిపినట్లు పొంగులేటి తెలిపారు.