ఒంగోలులో ఎస్సీ, ఎస్టీ, బీసీ, మైనారిటీ హాస్టల్ విద్యార్థులకు వస్తువుల పంపిణీ; రూ.143 కోట్లతో మరమత్తులు

ప్రకాశం జిల్లా ఒంగోలులోని జేడీ సీలం భవనంలో ఎస్సీ, ఎస్టీ, బీసీ, మైనారిటీ హాస్టల్ విద్యార్థులకు మంత్రి డోలా శ్రీ బాలవీరాంజనేయ స్వామి నైట్ డ్రెస్, స్వెటర్లు, షూస్, టవల్, బెడ్ షీట్లు, ట్రంక్ పెట్టెలు, ప్లేట్లు, గ్లాసులు పంపిణీ చేశారు. ఈ సందర్భంగా మాట్లాడుతూ, ప్రభుత్వం విద్యార్థుల సంక్షేమానికి ప్రాధాన్యత ఇస్తోందని తెలిపారు.

హాస్టళ్ల మరమత్తులకు ₹143 కోట్లు, కొత్త హాస్టళ్ల నిర్మాణానికి ₹200 కోట్లు కేటాయించినట్లు మంత్రి వెల్లడించారు. బాలికల భద్రత కోసం హాస్టళ్లలో సీసీ కెమెరాలు ఏర్పాటు చేశామన్నారు. అనాథ పిల్లల కోసం ‘అనురాగం’ పథకం ద్వారా సెలవు దినాల్లో అండగా నిలుస్తున్నామని వివరించారు.

ఐఐటీ, ఎన్ఐటీ ప్రవేశాలకు ఏర్పాటు చేసిన కోచింగ్ సెంటర్ల గురించి కూడా మంత్రి మాట్లాడారు. ఎస్సీ, ఎస్టీ, బీసీ, మైనారిటీ విద్యార్థులకు సంవత్సరానికి 500 ఐఐటీ/ఎన్ఐటీ సీట్లు లక్ష్యంగా పెట్టినట్లు తెలిపారు. గతేడాది 50 మందికి సీట్లు రాగా, ఈ ఏడాది 90 మందికి పైగా వచ్చే అవకాశం ఉందన్నారు. ఎంబీబీఎస్ లాంగ్ టర్మ్ కోచింగ్, యూపీఎస్సీ, గ్రూప్-1, గ్రూప్-2, డీఎస్సీ కోచింగ్లు అందిస్తున్నామని, పోటీ పరీక్షలకు శిక్షణను కొనసాగిస్తామని మంత్రి స్పష్టం చేశారు.

విద్య ద్వారానే ఆర్థికాభివృద్ధి సాధ్యమని ముఖ్యమంత్రి చంద్రబాబు నాయుడు భావిస్తున్నారని మంత్రి పేర్కొన్నారు. ప్రభుత్వం విద్యా రంగంపై ప్రత్యేక దృష్టి పెట్టి పనిచేస్తోందని ఆయన తెలిపారు.