తిరుపతిలో RA NTR అసోసియేషన్ ప్రెస్ మీట్‌పై ఉద్రిక్తత; పోలీసుల భద్రత

తిరుపతిలోని తాజ్ హోటల్ వద్ద శనివారం ఉదయం ఉద్రిక్తత నెలకొంది. RA NTR అసోసియేషన్ పేరుతో ప్రెస్ మీట్ నిర్వహించనుండటంతో ఈ పరిస్థితి ఏర్పడింది.

అసోసియేషన్ ₹100 కోట్ల సేవా కార్యక్రమాల వివరాలను ప్రకటించేందుకు ఈ సమావేశం ఏర్పాటు చేసింది. సోషల్ మీడియాలో నటుడు జూనియర్ ఎన్టీఆర్ స్వయంగా హాజరవుతారని ప్రచారం జరిగింది.

జూనియర్ ఎన్టీఆర్ అభిమాన సంఘం రాష్ట్ర కన్వీనర్ కృష్ణ యాదవ్ ఈ ప్రచారాన్ని ఖండించారు. ఆయన ఎటువంటి సమావేశానికి రావడం లేదని, ఈ కార్యక్రమానికి తమ అనుమతి లేదని స్పష్టం చేశారు. ఈ వివాదంపై తిరుపతి ఎస్పీకి ఫిర్యాదు చేశామని తెలిపారు.

మరోవైపు RA NTR అసోసియేషన్ అధ్యక్షుడు సాయిరూప్ మాత్రం ప్రెస్ మీట్ నిర్వహిస్తామని, వెనక్కి తగ్గబోమని సోషల్ మీడియాలో వీడియో విడుదల చేశారు.

ఇరు వర్గాల మధ్య వివాదం నేపథ్యంలో హోటల్ యాజమాన్యం భద్రత కోసం పోలీసులను ఆశ్రయించింది. దీంతో పోలీసులు అక్కడ భారీ బందోబస్తు ఏర్పాటు చేశారు. ప్రస్తుతం ప్రెస్ మీట్ నిర్వహించాలా వద్దా అనేది పోలీసుల నిర్ణయంపై ఆధారపడి ఉంది.