అనుమతి లేని రీటైనింగ్ వాల్ నిర్మాణంపై కాంట్రాక్టర్‌ని అరెస్ట్ చేయాలని ఏపీ మంత్రి నిమ్మల ఆదేశం

ఏపీ నీటిపారుదల శాఖ మంత్రి నిమ్మల రామానాయుడు అమలాపురంలో పర్యటించారు. నడిపూడి సమీపంలో కాల్వ గట్టున ఒక కాంట్రాక్టర్ అనుమతి లేకుండా రీటైనింగ్ వాల్ నిర్మించడాన్ని గమనించి తీవ్రంగా మందలించారు. కాలువలో నీరు వదిలిన తర్వాత కూడా అనుమతులు లేకుండా పనులు చేయడం వల్ల రైతుల పొలాల్లో నీరు నిలిచిపోవడంతో ఆగ్రహం వ్యక్తం చేశారు.

పోలవరం ప్రాజెక్టులో రాత్రింబవళ్ళు పనులు జరుగుతుండగా, ఈ కాంట్రాక్టర్ మాత్రం పొద్దున ఆరు నుంచి సాయంత్రం ఆరు వరకే పనులు చేయడం సరి కాదని మంత్రి ప్రశ్నించారు. అనంతరం జిల్లా ఎస్పీకి ఫోన్ చేసి, కాంట్రాక్టర్‌పై కేసు నమోదు చేసి అరెస్ట్ చేయాలని ఆదేశించారు.

ఈ విషయాన్ని ముఖ్యమంత్రి చంద్రబాబు నాయుడుకు తెలియజేస్తానని మంత్రి హెచ్చరించారు. కాంట్రాక్టర్ ఇరిగేషన్ శాఖ నుంచి తగిన అనుమతి తీసుకోకుండా నిబంధనలు ఉల్లంఘించినట్లు ఆరోపించారు.