ఆక్వా రంగం, పొగాకు రైతులకు సాయం కోరుతూ కేంద్ర మంత్రి నిర్మల సీతారామన్‌తో సీఎం చంద్రబాబు భేటీ

సీఎం చంద్రబాబు నాయుడు అమరావతిలోని తన క్యాంపు కార్యాలయంలో కేంద్ర ఆర్థిక శాఖ మంత్రి నిర్మల సీతారామన్‌తో సమావేశమయ్యారు. ఆక్వా రంగం, పొగాకు రైతులు, రాయలసీమ ఉద్యానవన అభివృద్ధి తదితర అంశాలపై ఇరువురూ చర్చించారు.

ఆక్వా రంగం గురించి మాట్లాడుతూ, రొయ్యల మేత తయారీలో ఉపయోగించే ముడి పదార్థాల ధరలు భారీగా పెరిగాయని సీఎం వివరించారు. జనవరి నుంచి ఏప్రిల్ మధ్యలో ఫిష్ మెల్ టన్ను ధర రూ.1.55 లక్షల నుంచి రూ.2.40 లక్షలకు, ఫిష్ ఆయిల్ టన్ను ధర రూ.2.80 లక్షల నుంచి రూ.4.40 లక్షలకు, సోయా లెసిథిన్ టన్ను ధర రూ.68,000 నుంచి రూ.1.10 లక్షలకు చేరిందని తెలిపారు. మొత్తం మేత ధర టన్నుకు రూ.25,000 వరకు పెరిగినట్లు సీఎం కేంద్ర మంత్రి దృష్టికి తీసుకొచ్చారు. ధరల స్థిరీకరణకు చర్యలు తీసుకోవాలని, రూ.100 కోట్ల కార్పస్ ఫండ్‌తో ఆంధ్రప్రదేశ్ ప్రాన్ ప్రొడ్యూసర్స్ కోఆర్డినేషన్ కమిటీని ఏర్పాటు చేసేందుకు నిధులు మంజూరు చేయాలని కోరారు.

అమెరికా విధిస్తున్న సుంకాలపై కూడా సీఎం ఆందోళన వ్యక్తం చేశారు. భారత రొయ్యలపై అమెరికా 5.77% కౌంటర్‌వెలింగ్ డ్యూటీ విధించిందని, రెసిప్రోకల్ టారిఫ్‌ల వల్ల 30 లక్షల మంది జీవనోపాధి దెబ్బతినే అవకాశం ఉందని తెలిపారు. ఎగుమతులను కాపాడేందుకు సీఫుడ్‌పై ప్రస్తుతమున్న 30% కస్టమ్స్ సుంకాన్ని సున్నాకు తగ్గించాలని, వివిధ అంతర్జాతీయ మార్కెట్లకు ఎగుమతులు పెంచేందుకు కేంద్రం సంప్రదింపులు జరపాలని సీఎం విజ్ఞప్తి చేశారు.

పొగాకు రైతుల సమస్యలపై సీఎం మాట్లాడుతూ, జీఎస్టీ అమలు నుంచి సిగరెట్లపై ఎక్సైజ్ సుంకం పెరిగి, తయారీదారుల కొనుగోళ్లు తగ్గాయని తెలిపారు. ఈ ఏడాది 230 మిలియన్ కేజీల పొగాకు ఉత్పత్తి కాగా, కేవలం 34 మిలియన్ కేజీలు మాత్రమే కొనుగోలు జరిగాయని వివరించారు. రైతులు, కూలీలు, రవాణాదారులు తీవ్రంగా ప్రభావితమవుతున్నందున తక్షణ చర్యలు తీసుకోవాలని కేంద్రాన్ని కోరారు.

రాయలసీమ సమగ్ర ఉద్యానవన అభివృద్ధి ప్రణాళికను కూడా సీఎం వివరించారు. 2011 క్లస్టర్లలో రూ.14,906 కోట్ల పెట్టుబడి ద్వారా 9 లక్షల మంది రైతులకు లబ్ధి కలుగుతుందని, వ్యవసాయంలో యాంత్రీకరణతో దిగుబడి 10% పెంచాలనే లక్ష్యంతో పని చేస్తున్నామన్నారు. ఆగస్టు 6న హార్టికల్చర్ హబ్ పనులు ప్రారంభిస్తామని, ఈ కార్యక్రమానికి హాజరు కావాలని నిర్మల సీతారామన్‌ను సీఎం ఆహ్వానించారు. అలాగే రిలయన్స్ భాగస్వామ్యంతో ఇండియన్ స్కూల్ ఆఫ్ అగ్రికల్చర్ ఏర్పాటుకు ఆగస్టు 3న ఎంఓయు చేసుకుంటామని, ఇప్పటికే భూమి గుర్తించామని తెలిపారు. దీనిపై కేంద్రం తోడ్పాటు కోరారు.