ఘజియాబాద్‌లో రేప్ బాధిత బాలికకు చికిత్స చేయని డాక్టర్లపై సుప్రీం ఆగ్రహం

ఘజియాబాద్‌లో నాలుగేళ్ల బాలికపై అత్యాచారం జరిగిన ఘటనలో చికిత్స చేయని ప్రైవేట్ ఆస్పత్రుల డాక్టర్లపై సుప్రీంకోర్టు తీవ్ర ఆగ్రహం వ్యక్తం చేసింది. వృత్తిధర్మం పాటించకుండా నిర్దయగా ప్రవర్తించారని మండిపడింది.

మార్చి 16న ఘజియాబాద్‌లో ఓ నాలుగేళ్ల బాలిక అత్యాచారానికి గురై అపస్మారక స్థితికి చేరుకుంది. తల్లిదండ్రులు ఆమెను రెండు ప్రైవేట్ ఆస్పత్రులకు తీసుకువెళ్లగా వైద్యులు చేర్చుకోవడానికి నిరాకరించారు. ఆ తర్వాత ప్రభుత్వ ఆస్పత్రికి తరలించగా అప్పటికే బాలిక మృతి చెందింది. పోలీసులు కూడా కేసు నమోదు చేయకుండా బాధిత కుటుంబాన్ని బెదిరించారు.

బాలిక తండ్రి సుప్రీంకోర్టును ఆశ్రయించి ఎస్ఐటీ లేదా సీబీఐ విచారణ కోరారు. ప్రధాన న్యాయమూర్తి జస్టిస్ సూర్యకాంత్ నేతృత్వంలోని ధర్మాసనం పిటిషన్ విచారించింది. 'చావుబతుకుల మధ్య ఉన్న చిన్నారిని ఎందుకు చేర్చుకోలేద'ని సీజేఐ నిలదీశారు. 'తల్లిదండ్రులు నిరుపేదలని ఫీజులు చెల్లించలేరని చేర్చుకోలేదా' అని ప్రశ్నించారు.

వైద్యం అందించకుండా పేర్ల ముందు 'డాక్టర్' రాసుకోవడం ఎందుకని ధర్మాసనం మండిపడింది. నిందితుడిపై పోక్సో కేసు నమోదు చేయని పోలీసులపైనా కోర్టు అసహనం వ్యక్తం చేసింది. బెంచ్ అనంతరం తదుపరి విచారణ వచ్చే వారానికి వాయిదా వేసింది.