శ్రీకాకుళం: అంతరాష్ట్ర దొంగల ముఠా అరెస్టు, ఇద్దరు నిందితుల నుండి బంగారం, వెండి స్వాధీనం

ఉత్తరాంధ్ర, ఒడిస్సా ప్రాంతాల్లో పలు చోరీలకు పాల్పడుతున్న అంతరాష్ట్ర దొంగల ముఠాను శ్రీకాకుళం పోలీసులు అరెస్టు చేశారు. జిల్లా ఎస్పీ కేవి మహేశ్వర్ రెడ్డి ఈ వివరాలు వెల్లడించారు.

పశ్చిమ బెంగాల్ లోని మాల్దా జిల్లా గోయిస్పూర్ కు చెందిన మహమ్మద్ మిజాన్, మహమ్మద్ హసన్ లను అరెస్టు చేసినట్లు ఎస్పీ తెలిపారు. వీరి నుండి 141 గ్రాముల బంగారు ఆభరణాలు, 20 కిలోల వెండి వస్తువులు, రూ.1.5 లక్షల నగదు, ఒక ద్విచక్ర వాహనాన్ని స్వాధీనం చేసుకున్నామన్నారు. స్వాధీనం చేసుకున్న సొత్తు మొత్తం విలువ సుమారు రూ.80 లక్షలు ఉంటుందని ఎస్పీ పేర్కొన్నారు.

గత మూడు నాలుగు నెలల్లో వీరు కాసిబుగ్గ పోలీస్ స్టేషన్ పరిధిలో మూడు, టెక్కలి పోలీస్ స్టేషన్ పరిధిలో ఒకటి, పార్వతీపురం జిల్లాలో ఒకటి, ఒడిస్సా రాష్ట్రంలోని బెరంపూర్ లో ఒకటి కలిపి మొత్తం ఆరు కేసుల్లో నిందితులుగా ఉన్నట్లు పోలీసులు గుర్తించారు. అరెస్టు తర్వాత నిందితులను రిమాండ్ కు తరలించినట్లు అధికారులు తెలిపారు.