ప్రపంచ పులుల దినోత్సవం: ఏపీలో 68 పులులు, 11 పిల్లలు – పవన్ కళ్యాణ్

ప్రపంచ పులుల దినోత్సవం సందర్భంగా ఉపముఖ్యమంత్రి పవన్ కళ్యాణ్ వన్యప్రాణి ప్రేమికులకు శుభాకాంక్షలు తెలిపారు. రాష్ట్రంలో పులుల సంరక్షణకు, సంఖ్య పెంచడానికి చర్యలు తీసుకుంటున్నామని చెప్పారు.

ప్రాజెక్ట్ టైగర్ వంటి కార్యక్రమాలతో భారతదేశం ప్రపంచంలోని 75% పులులకు నిలయంగా నిలిచిందని, ఇది అపూర్వ పర్యావరణ విజయమని ఆయన పేర్కొన్నారు. దేశంలోనే అతిపెద్ద పులుల సంరక్షణ కేంద్రమైన నాగార్జున సాగర్ శ్రీశైలం టైగర్ రిజర్వ్ ఆంధ్రప్రదేశ్‌లో ఉండటం గర్వకారణమన్నారు. తాజా అంచనాల ప్రకారం రాష్ట్రంలో 68 పెద్ద పులులు, 11 పులి పిల్లలు ఉన్నట్లు తెలిపారు.

తూర్పు కనుమల్లో పులుల జనాభా పెంచేందుకు మహారాష్ట్రలోని చంద్రపూర్, మధ్యప్రదేశ్ నుంచి నాలుగు ఆడపులులను తీసుకురావడానికి ప్రణాళిక సిద్ధమైందని పవన్ కళ్యాణ్ వివరించారు. అలాగే నాగార్జున సాగర్ శ్రీశైలం రిజర్వ్‌లో వేట నిరోధక శిబిరాల సంఖ్యను 89 నుంచి 150కు పెంచామని, దీనివల్ల సుమారు 800 మంది గిరిజన యువతకు ఉపాధి లభిస్తుందని చెప్పారు.

నల్లమల అడవుల్లో పులి గర్జన శాశ్వతంగా వినిపించేలా సమిష్టి కృషి చేయాలని ఆయన పిలుపునిచ్చారు.