ఇరాన్-అమెరికా మధ్య శాంతి ఒప్పందం: జూన్ 19న స్విట్జర్లాండ్‌లో సంతకాలు?

అమెరికా అధ్యక్షుడు డొనాల్డ్ ట్రంప్ ఇరాన్‌తో ప్రాథమిక శాంతి ఒప్పందాన్ని ప్రకటించారు. లెబనాన్‌తో సహా అన్ని రంగాల్లో తక్షణమే శాశ్వత కాల్పుల విరమణ, 30 రోజుల్లో అమెరికా నౌకా దిగ్బంధనం ఎత్తివేత, హార్ముజ్ జలసంధి ద్వారా నౌకా రవాణా పూర్తిస్థాయిలో తిరిగి ప్రారంభించడం వంటి అంశాలు 14 పాయింట్ల అవగాహన ఒప్పందం (ఎంవోయు)లో చేర్చారు.

ఒప్పందంలో భాగంగా, అమెరికా, మిత్రదేశాలు ఇరాన్‌కు కనీసం 300 బిలియన్ డాలర్ల విలువైన పునర్నిర్మాణ ప్రణాళికలు అందిస్తాయి. ఇరానియన్ చమురు, ఇంధనంపై ఆంక్షలు ఎత్తివేస్తాయి. స్తంభింపచేసిన 24 బిలియన్ డాలర్ల ఇరానియన్ ఆస్తులను విడుదల చేస్తాయి. ఇరాన్ తన వంతుగా అణ్వాయుధ ఉత్పత్తి చేయబోమని హామీ ఇచ్చింది. కొత్తగా అమెరికా బలగాలు లేదా ఆంక్షలు ఉండబోవని అంగీకరించింది.

మిగిలిన వివరాలను 60 రోజుల చర్చల ద్వారా ఖరారు చేయనున్నారు. ఆ తర్వాత ఐక్యరాజ్యసమితి భద్రతా మండలి తీర్మానం ద్వారా తుది ఒప్పందం ఆమోదం పొందనుంది. జూన్ 19న స్విట్జర్లాండ్‌లోని జెనీవాలో ఇరు దేశాల మధ్య ఒప్పందంపై సంతకాలు జరిగే అవకాశం ఉందని వార్తలు వెలువడుతున్నాయి. ఈ సందర్భంగా అమెరికా ఉపాధ్యక్షుడు జేడీ వాన్స్ జెనీవా వెళ్లే అవకాశం ఉందని సమాచారం.

ఈ పరిణామం వల్ల హార్ముజ్ జలసంధి తిరిగి తెరచుకోవడంతో పాటు, పెరిగిన చమురు ధరలకు కొంత ఉపశమనం లభిస్తుందని ట్రంప్ అన్నారు. అయితే, ఇజ్రాయెల్ లెబనాన్‌ను ఒప్పందంలో చేర్చడాన్ని వ్యతిరేకిస్తున్నట్లు, అణు చర్చలతో ముడిపెట్టాలని కోరుతున్నట్లు తెలుస్తోంది. ఈ కారణంగా కొన్ని సమస్యలు మిగిలి ఉన్నాయని భావిస్తున్నారు. అయినప్పటికీ ఇరు దేశాలు చాలా అంశాలపై ఏకాభిప్రాయానికి వచ్చినట్లు ట్రంప్ పేర్కొన్నారు.