విమర్శలు సహజమే, గత నాయకుల కృషితోనే దేశం ముందుకు వచ్చింది: సీఎం రేవంత్ రెడ్డి

తెలంగాణ సీఎం రేవంత్ రెడ్డి నేతలపై విమర్శలు సహజమైనవని అభిప్రాయపడ్డారు. స్వాతంత్ర్యం వచ్చినప్పుడు సగటు జీవన కాలం 32 సంవత్సరాలు ఉండేదని, ఇప్పుడు అది 73 సంవత్సరాలకు పెరిగిందని ఆయన తెలిపారు.

నెహ్రూ, ఇందిరా గాంధీ వంటి నాయకులను ప్రజలు విమర్శించినా, వారు రూపొందించిన విధానాలే దేశ పురోగతికి పునాది అని సీఎం పేర్కొన్నారు. ఆహార సమస్య, విద్యా సమస్య తీరిన తర్వాత, ఇప్పుడు ప్రపంచంతో పోటీ పడేలా తెలంగాణను తీర్చిదిద్దాలనేదే ప్రభుత్వ లక్ష్యమన్నారు.

విద్యా మౌలిక సదుపాయాల గురించి వివరించిన రేవంత్ రెడ్డి, ప్రతి 2 కి.మీ.కు ప్రాథమిక పాఠశాల, 5 కి.మీ.కు ప్రాథమికోన్నత పాఠశాల, 10 కి.మీ.లోపు ఉన్నత పాఠశాల, ప్రతి మండలానికి జూనియర్ కాలేజీ, నియోజకవర్గానికి డిగ్రీ కాలేజీ నెలకొల్పాలనే ప్రణాళికలను గుర్తు చేశారు. ఉమ్మడి పది జిల్లాలకు పది యూనివర్సిటీల ఏర్పాటు కూడా కాంగ్రెస్ హయాంలో జరిగిందన్నారు.

రెసిడెన్షియల్ పాఠశాలల భావన మాజీ ప్రధాని పీవీ నరసింహారావు నుంచి వచ్చిందని ఆయన చెప్పారు. పీవీ నరసింహారావు హెచ్ఆర్డీ మంత్రిగా ఉండగా నల్గొండ జిల్లాలో మొదటి రెసిడెన్షియల్ స్కూల్ ప్రారంభించారని, ఇదే నవోదయ పాఠశాలలకు, నేడు నిర్మిస్తున్న రెసిడెన్షియల్ స్కూళ్లకు స్ఫూర్తి అన్నారు.

ప్రస్తుతం తిండిలో పోషకాహారం, విద్యలో నాణ్యత అవసరమని సీఎం నొక్కి చెప్పారు. జపాన్, దక్షిణ కొరియా, ఫిన్‌లాండ్, చైనా వంటి దేశాలతో పోటీపడేలా తెలంగాణ విద్యార్థులను తీర్చిదిద్దాలని ఆయన ఆకాంక్షించారు.