భౌగోళిక ఉద్రిక్తతలతో స్టాక్ మార్కెట్లు కుప్పకూలాయి; సెన్సెక్స్ 882 పాయింట్లు, నిఫ్టీ 220 పాయింట్లు డౌన్

ఇరాన్-అమెరికా మధ్య ఉద్రిక్తతలు తీవ్రమవుతుండటంతో ఈరోజు భారతీయ స్టాక్ మార్కెట్లు భారీ నష్టాలతో ప్రారంభమయ్యాయి.

ఉదయం 9:35 గంటలకు సెన్సెక్స్ 882 పాయింట్లు పతనమై 73,772 వద్ద ట్రేడ్ అవుతోంది. నిఫ్టీ 220 పాయింట్లు కోల్పోయి 23,271 వద్దకు చేరింది.

డాలర్ మారకంలో రూపాయి విలువ క్షీణించింది. ఐటీ, బ్యాంకింగ్ రంగ షేర్లలో అమ్మకాల ఒత్తిడి కనిపించింది. టీసీఎస్, టెక్ మహీంద్రా, ఇన్ఫోసిస్ వంటి షేర్లు నష్టపోయాయి.

మరోవైపు అదానీ పోర్ట్స్, అపోలో హాస్పిటల్స్, కోల్ ఇండియా, టాటా కన్స్యూమర్ ప్రొడక్ట్స్, ఓఎన్జీసీ షేర్లు లాభాల్లో కొనసాగాయి.

పశ్చిమాసియా ఉద్రిక్తతల వల్ల క్రూడ్ ఆయిల్ ధరలు పెరగడం, రూపాయి పతనం, విదేశీ పెట్టుబడిదారుల అమ్మకాలు ఈరోజు మార్కెట్ నష్టాలకు ప్రధాన కారణాలని విశ్లేషకులు తెలిపారు. అమెరికా-ఇరాన్ వివాదం అంతర్జాతీయ మార్కెట్లలో అనిశ్చితిని రేపడంతో భారత మార్కెట్లపై ప్రతికూల ప్రభావం పడింది.