పెద్దపులుల సంయోగ కాలం: ఇష్టకామేశ్వరి ఆలయ దర్శనాలు మూడు నెలలు నిలిపివేత

పెద్దపులుల వంశాభివృద్ధి కాలాన్ని దృష్టిలో ఉంచుకుని ప్రకాశం జిల్లా మార్కాపురం రెవెన్యూ డివిజన్‌లోని ఎర్రగొండపాలెం మండలం నెక్కంటి అటవీ రేంజ్‌లో ఉన్న ఇష్టకామేశ్వరి దేవి ఆలయ దర్శనాన్ని మూడు నెలల పాటు నిలిపివేశారు. జూలై 1 నుంచి సెప్టెంబర్ ఆఖరి వరకు ఈ నిలిపివేత వర్తిస్తుందని దోర్ణల అటవీ అధికారి హరి తెలిపారు. నల్లమల అడవిలోని జంగిల్ రైడ్‌తో పాటు భక్తుల దర్శనానికి కూడా ఈ సమయంలో అనుమతి ఉండదని స్పష్టం చేశారు.

ఈ నిర్ణయంతో ఆలయం వద్ద చిన్నతరహా వ్యాపారాలు చేసుకునే 30 చెంచు కుటుంబాల జీవనోపాధికి తీవ్ర ఇబ్బంది ఏర్పడింది. మూడు నెలలు ఉపాధి లేకపోతే తమ బతుకు భారం అవుతుందని వారు ఆందోళన వ్యక్తం చేస్తున్నారు. “మేము లోన్లు తీసుకొని షాపులకు, బండ్లకు పెట్టుబడి పెట్టి జీవనం సాగించాలనుకుంటున్నాం” అని ఒక చెంచు వ్యక్తి తెలిపారు.

వన్యప్రాణుల సంరక్షణ కోసం తీసుకున్న ఈ నిర్ణయానికి శ్రీశైలం వచ్చే భక్తులు సహకరించాలని అటవీ శాఖ కోరింది. పెద్దపులుల సంయోగ కాలంలో అడవిలో మానవ సంచారం వాటి పునరుత్పత్తికి అంతరాయం కలిగిస్తుందని అధికారులు వివరించారు.