వరంగల్ వరద ముంపు సమస్యకు పరిష్కారం: GWMC–NIT వరంగల్ మధ్య ఒప్పందం

వరంగల్ నగరంలో వరద ముంపు, డ్రైనేజీ సమస్యలకు పరిష్కారం కోసం గ్రేటర్ వరంగల్ మున్సిపల్ కార్పొరేషన్ (GWMC), NIT వరంగల్ మధ్య ఒప్పందం కుదిరింది. ఈ ఒప్పందంపై GWMC కమిషనర్ టి. వెంకన్న, NIT వరంగల్ డైరెక్టర్ ప్రొఫెసర్ విద్యాధర్ సుభుది సంతకాలు చేశారు.

జిల్లా కలెక్టర్, GWMC ప్రత్యేక అధికారి సమక్షంలో ఈ ఒప్పందం జరిగింది. నగరంలో కొత్తగా తీసుకురానున్న అండర్ డ్రైనేజీ వ్యవస్థకు NIT బృందం సాంకేతిక సలహాలు అందిస్తుంది. మురుగునీరు, డ్రైనేజీ, తేలికపాటి వర్షాలతో కూడా వచ్చే ముంపు సమస్యలకు పరిష్కారాలు చూపించాలని నగరపాలక సంస్థ కోరింది.

NIT వద్ద ఉన్న డ్రోన్లు, శాటిలైట్ డేటా సాయంతో రోడ్లు, ఖాళీ స్థలాలు, ట్రాఫిక్ మూవ్‌మెంట్‌ను మ్యాపింగ్ చేయాలని నిర్ణయించారు. పార్కింగ్ కోసం అనువైన ప్రదేశాలను గుర్తించాలని కలెక్టర్ కోరారు. డ్రైనేజీ నిర్మాణానికి ఎలాంటి పాలసీ ఉండాలి, రోడ్ల ఎత్తు ఎలా ఉండాలి అనే అంశాలపై NIT దీర్ఘకాలిక అధ్యయనం చేయనుంది.

GWMC పరిధిలో 66 డివిజన్లు ఉన్నాయి. ఇక్కడ 2.54 లక్షల ఇళ్లు, సుమారు 12 లక్షల జనాభా నివసిస్తున్నారని అధికారుల గణాంకాలు చెబుతున్నాయి. వరంగల్, హనుమకొండ, కాజీపేటతో కూడిన ట్రై సిటీ ప్రాంతం 407.71 చదరపు కిలోమీటర్లలో విస్తరించి ఉంది. గత మూడేళ్లలో ప్రతి సంవత్సరం నగరంలోని కాలనీలు, రోడ్లు వరద నీటిలో మునిగాయి.

స్మార్ట్ సిటీ ప్రణాళికలు, చెత్త నిర్వహణ, డిజిటల్ టెక్నాలజీ వినియోగంపైనూ ఈ ఒప్పందం ద్వారా సహకారం ఉంటుంది. మున్సిపల్ అధికారులకు శిక్షణ, నైపుణ్య అభివృద్ధి కార్యక్రమాలు కూడా నిర్వహించనున్నారు. ఉన్నత విద్య, పరిశోధనలకు కూడా ఇది వేదిక అవుతుందని NIT సివిల్ ఇంజినీరింగ్ ప్రొఫెసర్లు తెలిపారు.