TIMS ఆసుపత్రులు జూన్ 2 నుంచి పూర్తిస్థాయిలో పనిచేయాలి: CM రేవంత్ రెడ్డి ఆదేశం

హైదరాబాద్‌లోని TIMS ఆసుపత్రులు జూన్ 2 నుంచి పూర్తిస్థాయిలో అందుబాటులోకి రానున్నాయి. తెలంగాణ ఆవిర్భావ దినోత్సవం రోజే ఈ ఆసుపత్రులు ప్రారంభం కావాలని CM రేవంత్ రెడ్డి అధికారులను ఆదేశించారు. పేదలకు వైద్యం అందాలని ఆయన ఈ ఆదేశాలు జారీ చేశారు.

అల్వాల్, ఎల్‌బీ నగర్, సనత్ నగర్‌లో TIMS ఆసుపత్రులు ఏర్పాటు చేస్తున్నారు. సనత్ నగర్ ఆసుపత్రి ఇప్పటికే ప్రారంభమైంది. ప్రతి TIMS లో 36 డిపార్ట్‌మెంట్లు ఉంటాయని అధికారులు తెలిపారు. అల్వాల్ ఆసుపత్రిలో న్యూరాలజీ, హెమటాలజీ విభాగాలకు ప్రాధాన్యం ఇస్తారు. సనత్ నగర్‌లో కార్డియాలజీ సేవలు అందిస్తారు. అవసరాన్ని బట్టి డాక్టర్లు, నర్సులను ఇక్కడికి పంపిస్తారు.

పడకలు, డాక్టర్లు, నర్సులు, ల్యాబ్‌లు, ఆపరేషన్ థియేటర్లు అన్ని సౌకర్యాలతో ఈ ఆసుపత్రులు సిద్ధమవుతున్నాయి. పేషెంట్లతో వచ్చే వారు నేలపై పడుకోకుండా ప్రత్యేక భవనాలను కూడా నిర్మిస్తున్నారు.

గాంధీ, ఉస్మానియా, నిమ్స్ ఆసుపత్రులపై ఒత్తిడి తగ్గించేందుకు ఈ కొత్త ఆసుపత్రులు ఉపయోగపడతాయి. ఈ మూడు ఆసుపత్రుల్లో పడకలు, డాక్టర్లు, నర్సులు, ల్యాబ్‌లు వందల సంఖ్యలో తక్కువగా ఉన్నాయి. పంజాగుట్ట నిమ్స్‌లో కొత్త బ్లాక్‌లో చికిత్స కూడా ప్రారంభం కానుంది.

గోషామహల్‌లో 2000 పడకల కొత్త ఉస్మానియా ఆసుపత్రి నిర్మాణం జరుగుతోంది. ఇది డిసెంబర్ నాటికి ప్రారంభం కానుంది. వరంగల్ సెంట్రల్ జైల్ స్థలంలో సూపర్ స్పెషాలిటీ ఆసుపత్రి నిర్మిస్తున్నారు. ఇది మరో ఆరు నెలల్లో పూర్తవుతుంది. మహబూబాబాద్, జనగామ, ములుగు, భూపాలపల్లి, కరీంనగర్, ఖమ్మం జిల్లాల ప్రజలకు ఇది ఉపయోగపడుతుంది. ఆసుపత్రుల కోసం పట్నం వరకు రావాల్సిన అవసరం ఉండదని అధికారులు చెప్తున్నారు.