ISIS సెకండ్ ఇన్ కమాండ్ అబూ బిలాల్ అల్ మినుకి హతం — నైజీరియా-అమెరికా జాయింట్ ఆపరేషన్

అంతర్జాతీయ ఉగ్రవాద సంస్థ ISIS కి సెకండ్ ఇన్ కమాండ్ గా పనిచేసిన అబూ బిలాల్ అల్ మినుకిని నైజీరియా-అమెరికా జాయింట్ ఆపరేషన్లో హతమార్చారు. ఈ విషయాన్ని అమెరికా అధ్యక్షుడు డొనాల్డ్ ట్రంప్, నైజీరియా అధ్యక్షుడు బోలా తినుబు అధికారికంగా ప్రకటించారు.

నైజీరియా, చాద్, నైజర్, కెమరూన్ దేశాల సరిహద్దుల్లో ఉన్న లేక్ చాద్ బేసిన్ ప్రాంతంలోని మెటేలో అతడు రహస్య స్థావరాన్ని నిర్మించుకున్నట్లు intelligence వర్గాలు గుర్తించాయి. శనివారం రాత్రి ఉమ్మడి సైనిక దళాలు ఆ కాంపౌండ్‌పై దాడి చేశాయి. అల్ మినుకి తో పాటు అతడి ముఖ్య అనుచరులు కూడా హతమయ్యారు. నైజీరియా-అమెరికా సైన్యానికి ఎలాంటి ప్రాణనష్టం జరగలేదని సైనిక ప్రతినిధి తెలిపారు.

2023లో అమెరికా అతడిని global terrorist గా ప్రకటించింది. ISIS గ్లోబల్ నెట్‌వర్క్‌లో Head of General Directorate of States అనే కీలకమైన పదవిలో అతడు ఉన్నాడు. పశ్చిమ ఆఫ్రికాలో పౌరులపై జరిగిన అనేక దాడులకు అతడే వ్యూహకర్త అని తెలిపారు. 2018లో నైజీరియాలోని డైప్చి బోర్డింగ్ స్కూల్ నుండి 110 మందికి పైగా విద్యార్థులను కిడ్నాప్ చేసిన ఘటన వెనుక కూడా అతడి పాత్ర ఉందని చెప్తున్నారు.

2015లో ISIS కి విధేయత ప్రకటించే ముందు అల్ మినుకి బోకో హరాం ఉగ్రవాద సంస్థలో సీనియర్ కమాండర్‌గా ఉన్నాడు. 2024లో నైజీరియా సైన్యం ఇతడిని చంపేసినట్లు ప్రకటించినప్పటికీ, ఈ జాయింట్ ఆపరేషన్ ద్వారా అతడి మరణం అధికారికంగా ధృవీకరించబడింది.

ట్రంప్ మాట్లాడుతూ, ఈ ఆపరేషన్ ISIS గ్లోబల్ నెట్‌వర్క్‌ను, వారి funding routes ను దెబ్బతీసిందని పేర్కొన్నారు. ఆఫ్రికా ప్రజలకు మరియు అమెరికన్లకు పెద్ద ముప్పు ముగిసిందని చెప్పారు.