జగద్గురు శంకరాచార్యుల అద్వైత సిద్ధాంత మహత్యం

ఆది శంకరాచార్యులు ప్రతిపాదించిన అద్వైత సిద్ధాంతం హిందూ తాత్విక సంప్రదాయంలో విశిష్టమైన స్థానాన్ని కలిగి ఉంది. భక్తి మార్గం, కర్మ మార్గం వంటి వేర్వేరు సాధనా మార్గాలను శంకరాచార్యులు తమ అద్వైత సిద్ధాంతంలో సమన్వయపరచారు.

ఒక పెద్ద చెట్టు నీడలో చిన్న చెట్లు పెరగవు అనేది సామెత. అయితే శంకరాచార్యుల సిద్ధాంతం ఆ పెద్ద చెట్టు లాంటిదే అయినా, దాని కింద ఇతర మార్గాలు కూడా పెరిగేందుకు అవకాశం కలిగించిందని ఆధ్యాత్మిక ప్రవచనాల్లో చెప్తారు.

సన్యాస సంప్రదాయంలో నలుగురు గురువులు తెలిసి ఉండాలని శాస్త్రం చెప్తోంది. గురువుగారు, పరమ గురువుగారు, పరమేష్టి గురువుగారు, పరాపర గురువుగారు — ఈ నలుగురూ సన్యాసికి తెలిసి ఉండాలి. గృహస్థులకు గురువు వరకు తెలిస్తే సరిపోతుందని చెప్తారు.

శంకరాచార్యులు తమకు పూర్వం ఉన్న గురు పరంపర అందరినీ దర్శించుకున్నారని ప్రవచనంలో పేర్కొన్నారు. ఈ కారణంగానే ఆయన జగద్గురువు అనే పదవికి అర్హులయ్యారని చెప్తారు.