సాయి కృష్ణ తల్లి ఫిర్యాదు పట్టించుకోలేదని జగన్ ఆరోపణ

వైఎస్ఆర్‌సీపీ అధ్యక్షుడు జగన్మోహన్ రెడ్డి సాయి కృష్ణ కేసు విషయంలో విజయవాడ పోలీస్ కమిషనర్‌పై ఆరోపణలు చేశారు. సాయి కృష్ణను మే 6న టాస్క్‌ఫోర్స్ పోలీసులు మార్కాపురం నుంచి తీసుకొచ్చి కృష్ణలంక పోలీస్ స్టేషన్‌కు అప్పగించినట్లు రిమాండ్ రిపోర్టులో పేర్కొన్నారని జగన్ తెలిపారు.

సాయి కృష్ణ తల్లి మే 28న రాత్రి 7:26 గంటలకు విజయవాడ సీపీకి ఫిర్యాదు అందజేశారని జగన్ చెప్పారు. తన కొడుకును పోలీసులు తీసుకొచ్చారని, ఇప్పటివరకు ఏ కోర్టులోనూ ప్రవేశపెట్టలేదని, లాకప్ డెత్ అనుమానాలున్నాయని రాసిన ఆ ఫిర్యాదుపై కమిషనర్ స్పందించలేదని ఆయన ఆరోపించారు.

టాస్క్‌ఫోర్స్ పోలీస్ కమిషనర్ అధీనంలో పనిచేస్తుందని, అయినా కమిషనర్ ఆ ఫిర్యాదును పట్టించుకోలేదని జగన్ విమర్శించారు. దీనిని బట్టి ప్రభుత్వానికి, పోలీసులకు చిత్తశుద్ధి లేదని, కేసును బలహీనపరిచే ప్రయత్నం జరుగుతోందని ఆయన ఆరోపించారు.

ఈ విషయంపై పోలీస్ కమిషనర్ లేదా రాష్ట్ర ప్రభుత్వం నుంచి స్పందన లభ్యం కాలేదు.