పొగాకు ధరలు తగ్గడంపై వైఎస్ జగన్ ఆందోళన, ప్రభుత్వ చర్యలపై విమర్శ

వైఎస్ జగన్ మోహన్ రెడ్డి ఆంధ్రప్రదేశ్‌లో పొగాకు రైతుల పరిస్థితిపై ఆందోళన వ్యక్తం చేశారు. ప్రస్తుత సీజన్‌లో ధరలు బాగా పడిపోయాయని, రైతులు తీవ్ర నష్టాలను ఎదుర్కొంటున్నారని ఆయన అన్నారు.

జగన్ అందించిన గణాంకాల ప్రకారం, 2023–24లో (వైఎస్సార్‌సీపీ హయాంలో చివరి సంవత్సరం) పొగాకు సగటు ధర కిలోకు రూ.289గా ఉండేది. ప్రెస్ ఇన్ఫర్మేషన్ బ్యూరో (PIB) డేటాను ఉటంకిస్తూ, ఇప్పుడు ఆ సగటు ధర రూ.214కి పడిపోయిందని, దీంతో కిలోకు రూ.75 నష్టం వస్తోందన్నారు.

ఈ ఏడాది 232 మిలియన్ కేజీల పొగాకు ఉత్పత్తి అయినప్పటికీ, కేవలం 47 మిలియన్ కేజీలు మాత్రమే కొనుగోలు చేశారని జగన్ ఆరోపించారు. టొబాకో బోర్డు 142 మిలియన్ కేజీల కొనుగోలు హామీ ఇచ్చినా, ఆ లక్ష్యంలో 33 శాతం కూడా చేరుకోలేదన్నారు. వేలం 105 రోజులు గడిచిపోయాయని, కర్ణాటక వేలం మొదలైతే ధరలు మరింత పడతాయనే భయం రైతుల్లో ఉందని చెప్పారు.

కేంద్ర ప్రభుత్వం, రాష్ట్ర ప్రభుత్వం రైతులకు అండగా నిలవాలని జగన్ డిమాండ్ చేశారు. తన హయాంలో మార్క్‌ఫెడ్‌ను కొనుగోలుదారుగా దింపి, కనీస ధరలు నిర్ణయించడం వల్ల ధరలు పెరిగాయని గుర్తు చేశారు. చంద్రబాబు ప్రభుత్వం ప్రకటించిన కిలోకు రూ.20 సబ్సిడీ సరిపోదని, అది 94 మిలియన్ కేజీలకే పరిమితమని, దీనివల్ల ధరలు మరింత తగ్గే ప్రమాదం ఉందని విమర్శించారు.

వడ్డీలేని రుణాల పథకాన్ని కూడా జగన్ ప్రస్తావించారు. వైఎస్సార్‌సీపీ హయాంలో రైతుకు రూ.లక్ష వరకు 0% వడ్డీతో రుణాలు ఇచ్చామని, ఆ పథకం ద్వారా 86.44 లక్షల మంది రైతులకు రూ.2,500 కోట్లు అందాయని చెప్పారు. ప్రస్తుతం ఆ పథకం రద్దు చేసి, కేవలం పొగాకు రైతులకు రూ.50,000 మాత్రమే ఇవ్వడం సరికాదన్నారు.

ఈ విషయంపై రాష్ట్ర ప్రభుత్వం స్పందన తెలియాల్సి ఉంది.