ఈసీపై జగ్గారెడ్డి విమర్శలు: ‘మోదీ ఆదేశాల మేరకే పనిచేస్తోంది’

తెలంగాణ ప్రదేశ్ కాంగ్రెస్ కమిటీ (టీపీసీసీ) వర్కింగ్ ప్రెసిడెంట్ జగ్గారెడ్డి సంగారెడ్డిలో అత్యవసర సమావేశం నిర్వహించి ఎన్నికల సంఘంపై విమర్శలు చేశారు. ప్రధాని నరేంద్ర మోదీ చెప్పినట్లే ఎన్నికల కమిషన్ పనిచేస్తుందని ఆయన ఆరోపించారు.

కొన్ని రాష్ట్రాల్లో ప్రతిపక్ష పార్టీల ఓట్లు తొలగించడం వలన బీజేపీకి అనుకూల ఫలితాలు వచ్చాయని జగ్గారెడ్డి అన్నారు. దేశంలో 543 లోక్‌సభ స్థానాలకు 300 సీట్లు కాంగ్రెస్ గెలిస్తేనే రాహుల్ గాంధీ ప్రధానమంత్రి అవుతారని, ఆయన ప్రధాని అయితే ఎన్నికల కమిషన్ స్వతంత్రంగా పనిచేస్తుందని జగ్గారెడ్డి అభిప్రాయపడ్డారు.

ఢిల్లీలో ఓట్ల దొంగతనం, అక్రమాలు జరుగుతున్నాయని, కొన్ని పార్టీల అనుకూల ఓట్లు తొలగిస్తున్నారని ఆయన ఆరోపించారు. తెలంగాణలో కాంగ్రెస్ ప్రభుత్వం ఉన్నందున ఓటరు జాబితా తొలగింపు జరగకుండా అప్రమత్తంగా ఉండాలని పార్టీ నేతలకు సూచించారు.