మిడ్ మానేర్ ప్రాజెక్టుకు భారీ వరద నీరు : 5,127 క్యూసెక్కుల నీటి విడుదల

రాజన్న సిరిసిల్ల జిల్లాలోని మిడ్ మానేర్ ప్రాజెక్టుకు భారీగా వరద నీరు వచ్చి చేరుతోంది. ప్రాజెక్టు నీటి నిల్వ సామర్థ్యం 27.5 టీఎంసీలు కాగా, ప్రస్తుతం 21 టీఎంసీలకు చేరింది.

ప్రాజెక్టుకు 13,368 క్యూసెక్కుల ఇన్‌ఫ్లో ఉంది. ఇందులో ఎల్లంపల్లి నుంచి 12,600 క్యూసెక్కులు, మూలవాగు, మానేరు వాగుల నుంచి 768 క్యూసెక్కుల నీరు వస్తోంది. నీటి మట్టం పెరగడంతో 11, 12, 13 గేట్లు తెరిచి ఎల్ఎండి (లోయర్ మానేరు డ్యామ్)కు 5,127 క్యూసెక్కుల నీటిని విడుదల చేస్తున్నారు.

తంగల్లపల్లి మండలం గోపాలరావుపల్లి సమీపంలోని మిడ్ మానేర్ బ్యాక్‌వాటర్ సందర్శించేందుకు హైదరాబాద్ నుంచి సుమారు 50 వాహనాల్లో పర్యాటకులు వచ్చారు. గుట్టలు, పచ్చని చెట్లతో ఆహ్లాదకరంగా ఉన్న ఈ ప్రాంతంలో వారు ఫోటోలు, వీడియోలు తీసుకున్నారు.

అయితే, బ్యాక్‌వాటర్ సమీపంలోని మైదానంలో కొందరు కార్లతో ప్రమాదకర విన్యాసాలు చేశారు. దీంతో స్థానికులు ఆందోళన వ్యక్తం చేస్తున్నారు. ఇలాంటి విన్యాసాల వల్ల ప్రమాదాలు జరిగే అవకాశం ఉందని, అధికారులు వెంటనే చర్యలు తీసుకోవాలని వారు కోరుతున్నారు.