జమ్మూలో తవి నదిలో చిక్కుకున్న ముగ్గురు యువకులను కాపాడిన పోలీసులు, ఎన్డీఆర్ఎఫ్

జమ్మూలోని తవి నదిలో నీటి మట్టం పెరిగి చిక్కుకున్న ముగ్గురు యువకులను పోలీసులు, ఎస్డీఆర్ఎఫ్ బృందాలు సురక్షితంగా రక్షించారు. శనివారం ఉదయం 8 గంటల ప్రాంతంలో ఈ ఘటన జరిగింది. ఉదంపూర్ ప్రాంతంలో కురిసిన వర్షం వల్ల నదిలో నీటి ప్రవాహం ఒక్కసారిగా పెరగడంతో వీరు నదిలో చిక్కుకున్నారు.

స్థానికుల సమాచారం మేరకు పోలీసులు, ఎస్డీఆర్ఎఫ్ సిబ్బంది వెంటనే స్పందించి రెండు నుంచి మూడు గంటలపాటు రెస్క్యూ ఆపరేషన్ నిర్వహించారు. ఎస్డీఆర్ఎఫ్ అధికారి హర్షపాల్ సింగ్ మాట్లాడుతూ, స్థానికుల ఫోన్ ద్వారా సమాచారం అందుకుని వెంటనే చర్యలు చేపట్టామని తెలిపారు. ముగ్గురు యువకులు ఉదయం నదిలో వ్యాయామం చేస్తూ, నీరు తక్కువగా ఉండడంతో నది దాటారు, కానీ తర్వాత నీరు పెరిగి వెనక్కి రాలేక ఇరుక్కుపోయారు.

ఈ నెలలో ఇది రెండో ఘటన. కేవలం పది రోజుల క్రితం కూడా ఇదే నదిలో నలుగురు వ్యక్తులు చిక్కుకోగా వారిని రక్షించారు. అధికారులు ప్రజలకు హెచ్చరికలు జారీ చేస్తున్నప్పటికీ, చాలామంది నిర్లక్ష్యంగా నదీ పరీవాహక ప్రాంతాల్లో సంచరిస్తున్నారు. వర్షాకాలంలో నది ప్రవాహం ఎప్పుడైనా పెరిగే అవకాశం ఉండటంతో, నదీ తీరాలకు దూరంగా ఉండాలని పోలీసులు సూచించారు.