జామ్‌నగర్‌లో భర్తను హత్య చేసి 12 అడుగుల లోతున పాతిపెట్టిన భార్య, ప్రియుడు

జామ్‌నగర్‌లో రెండేళ్లుగా అదృశ్యమైన వ్యక్తి హత్య కేసు బయటపడింది. భార్య, ప్రియుడు కలిసి అతన్ని హత్య చేసి మృతదేహాన్ని ఫ్యాక్టరీ షెడ్ కింద 12 అడుగుల లోతున పాతిపెట్టినట్లు పోలీసులు తెలిపారు.

పోలీసుల వివరాల ప్రకారం, జిగ్నేష్ మావాడియా (37) గత రెండేళ్లుగా కుటుంబానికి కనిపించలేదు. అతని భార్య పృథ్వి (భూమిబెన్), భర్త ఉద్యోగం కోసం ఆస్ట్రేలియా వెళ్లాడని, అక్కడ బిజీగా ఉండడంతో ఫోన్ చేయడం లేదని కుటుంబాన్ని నమ్మించింది. ఎంతకాలం గడిచినా ఎలాంటి సంప్రదింపులు లేకపోవడంతో అనుమానాలు మొదలయ్యాయి.

ఒక బంధువు ఆస్ట్రేలియా వెళ్తుండగా, జిగ్నేష్‌ను కలుసుకోవడానికి అతని చిరునామా కోరగా, పృథ్వి చిరునామా ఇవ్వలేకపోయింది. దీంతో కుటుంబం సిటీ బీ పోలీస్ స్టేషన్‌లో ఫిర్యాదు చేసింది. జిగ్నేష్ సోదరుడు అశోక్ ధర్మేశ్ భాయ్ మావాడియా ఇచ్చిన ఫిర్యాదు మేరకు పోలీసులు దర్యాప్తు చేపట్టారు.

విచారణలో పృథ్వి నేరం అంగీకరించింది. 2024 మే 31న రాత్రి, మద్యం పార్టీ పేరుతో జిగ్నేష్‌ను ఓ ఫ్యాక్టరీకి తీసుకెళ్లి, సైనైడ్ కలిపిన మద్యం తాగించి హత్య చేసినట్లు ఒప్పుకుంది. ఆమె ప్రియుడు నీలేష్‌తో కలిసి ఈ హత్య చేసినట్లు తెలిపింది. హత్య తర్వాత, డారెడ్ పారిశ్రామిక ప్రాంతంలోని ఫ్యాక్టరీలో 12 అడుగుల లోతైన గోతి తవ్వి మృతదేహాన్ని పాతిపెట్టారు. గోతిపై కాంక్రీట్ వేసి ఆనవాళ్లు చెరిపేశారు.

పోలీసులు, ఫోరెన్సిక్ బృందం సమక్షంలో తవ్వకాలు జరిపి మానవ అస్తిపంజరాన్ని వెలికి తీశారు. అది జిగ్నేష్‌దేనని నిర్ధారించేందుకు DNA పరీక్షలు కొనసాగుతున్నాయి. ఈ కేసులో పృథ్వి, నీలేష్‌తో పాటు మరో వ్యక్తిని అరెస్ట్ చేసినట్లు పోలీసులు తెలిపారు. దర్యాప్తు కొనసాగుతోంది.