45 రోజులైనా ధాన్యం కొనుగోలు లేదు: జనగామ రైతుల నిరసన

జనగామ జిల్లా కొడగండ్ల మండలం రంగాపురం గ్రామంలో రైతులు రోడ్డుపై ధాన్యం వస్తాలను బయటాయించి నిరసన తెలిపారు. నెల రోజులుగా ధాన్యం కొనే దిక్కు లేదని రైతులు ఆవేదన వ్యక్తం చేశారు. వెంటనే కొనుగోళ్లు వేగవంతం చేయాలని డిమాండ్ చేశారు.

యాదాద్రి భువనగిరి జిల్లాకు చెందిన రైతు మహిపాల్ రెడ్డి 45 రోజులుగా కొనుగోలు కేంద్రం దగ్గర నిరీక్షిస్తున్నాడు. స్పందన రాలేదని మోటకొండూరు మండలం చందేపల్లి నుంచి ఆలేరు వరకు తోపుడు బండిపై వడ్ల బస్తాలతో నిరసన యాత్ర చేశాడు.

మహబూబ్‌నగర్ జిల్లా పోతలమడుగు గ్రామంలోని భాను రైస్ మిల్లు క్వింటాల్‌కు 19 కిలోల తరుగు తీస్తోందని రైతులు ఆరోపిస్తున్నారు. దీన్ని రైతు తిరుపతయ్య తన మొబైల్‌లో రికార్డు చేశాడు. తరుగుకు ఒప్పుకుంటేనే ధాన్యం లోడ్ చేస్తామని మిల్లు నిర్వాహకులు చెప్తున్నారని రైతులు తెలిపారు.

మెదక్ జిల్లా నరసాపూర్ నియోజకవర్గం వెల్దుర్తి మండల కేంద్రంలో MLA సునీత లక్ష్మా రెడ్డి రైతులతో కలిసి ధర్నా నిర్వహించారు. అకాల వర్షాలకు ధాన్యం తడిసినా ప్రభుత్వం స్పందించలేదని ఆమె పేర్కొన్నారు. వనపర్తి జిల్లా పాన్గల్ మండలం చింతకుండలో మాజీ MLA వీరం హర్షవర్ధన్ రెడ్డి రైతుల గోడు అడిగి తెలుసుకొని కలెక్టర్‌తో ఫోన్లో మాట్లాడారు.

మహబూబ్‌నగర్ జిల్లా హుస్నాపూర్‌లో మాత్రం రైతు శ్రీనివాస్‌కు చెందిన 156 బస్తాల తడిసిన ధాన్యాన్ని అధికారులు కొనుగోలు చేసి పారబాయిల్డ్ రైస్ మిల్లుకు తరలించారు.

నాగర్‌కర్నూల్ జిల్లా అచ్చంపేట వ్యవసాయ మార్కెట్‌లో కాంటా వేసి సిద్ధంగా ఉన్న 107 మొక్కజొన్నల బస్తాలను గుర్తు తెలియని వ్యక్తులు తీసుకెళ్ళారు. మార్కెట్‌లో పర్యవేక్షణ లేకపోవడం వల్లనే ఇలా జరిగిందని రైతులు పేర్కొన్నారు.

ఈ విషయంపై తెలంగాణ ప్రభుత్వం అధికారిక స్పందన తెలియాల్సి ఉంది.