జానీ మాస్టర్-శేఖర్ మాస్టర్ మధ్య వివాదం: చిరంజీవి మధ్యవర్తిత్వంతో సామరస్యం

ప్రముఖ కొరియోగ్రాఫర్లు జానీ మాస్టర్, శేఖర్ మాస్టర్ మధ్య డాన్సర్ యూనియన్ అంశంపై తలెత్తిన విభేదాలు నటుడు చిరంజీవి జోక్యంతో సామరస్యంగా ముగిశాయి.

డాన్సర్ యూనియన్‌లో కొంతమంది డాన్సర్ల నుంచి డబ్బులు వసూలు చేస్తున్నారనే ఆరోపణల నేపథ్యంలో ఇరువురి వర్గీయుల మధ్య వాగ్వివాదం, ఘర్షణ జరిగినట్టు వార్తలు వచ్చాయి. దీంతో ఈ విషయం చిరంజీవి దృష్టికి వెళ్ళగా, ఆయన ఇరువురినీ తన నివాసానికి పిలిపించి చర్చలు జరిపారు.

ఈ చర్చల అనంతరం జానీ మాస్టర్ భార్య విలేకరులతో మాట్లాడుతూ, ఇద్దరి మధ్య ఎలాంటి వ్యక్తిగత విభేదాలు లేవని, చిన్న అభిప్రాయ భేదాలు కుటుంబ సమస్యల మాదిరిగానే పరిష్కారం అయ్యాయని తెలిపారు. కలిసి భోజనం చేసిన ఫోటోను చూపించారు.

'మా మధ్య మొదటి నుంచి సయోధ్య ఉంది. డాన్సర్ యూనియన్ వ్యవహారాల్లో భిన్నాభిప్రాయాలు వచ్చాయి. అది మీడియాలో అనవసరంగా పెద్దదైంది' అని ఆమె స్పష్టం చేశారు. చిరంజీవి ప్రమేయంతో ఇరువురు కలిసుంటామని, యూనియన్ అభివృద్ధికి కృషి చేస్తామని చెప్పారు.