జపాన్‌ను వణికిస్తున్న నాఫ్తా సంక్షోభం: పశ్చిమాసియా యుద్ధం ప్రభావం

జపాన్‌లో నాఫ్తా కొరత తీవ్రంగా మారింది. దేశంలోని పారిశ్రామిక రంగంపై ఈ సంక్షోభం ప్రభావం పడుతోంది.

నాఫ్తా అంటే ముడి చమురు శుద్ధి ప్రక్రియలో లభించే ఒక ద్రవ హైడ్రో కార్బన్ మిశ్రమం. ప్లాస్టిక్స్, సింథటిక్ రబ్బర్, పెయింట్లు, సబ్బులు, డిటర్జెంట్లు, వైద్య సామగ్రి తయారీకి నాఫ్తా ముఖ్యమైన ముడి సరుకు.

జపాన్ తన అవసరమైన నాఫ్తాలో దాదాపు 93% దిగుమతి చేసుకుంటుంది. అందులో సుమారు 40% పశ్చిమాసియా దేశాల నుండి వస్తుంది. పశ్చిమాసియాలో ఇరాన్ సంక్షోభం కారణంగా స్ట్రెయిట్ ఆఫ్ హర్మజ్ గుండా చమురు రవాణాకు అంతరాయం కలిగింది. దీంతో జపాన్‌కు వచ్చే నాఫ్తా సరఫరా దెబ్బతింది. నాఫ్తా ధర 79% పెరిగింది.

ఈ కొరత వల్ల జపాన్ పరిశ్రమలపై నేరుగా ప్రభావం పడుతోంది. స్నాక్స్ తయారీ సంస్థ Calbee తన పొటాటో చిప్స్ ప్యాకెట్లను బ్లాక్ అండ్ వైట్‌లో మాత్రమే విడుదల చేస్తున్నట్లు ప్రకటించింది. ఫుడ్ బ్రాండ్ Nissin Sipoon Well తమ ప్యాకెట్లపై కలర్ టేపులు తీసేసి సాదా ప్లాస్టిక్ టేపులు వాడటం ప్రారంభించింది. మరో సంస్థ Miskan తన నాలుగు రకాల ఉత్పత్తుల విక్రయాలను తాత్కాలికంగా నిలిపేసింది.

నాఫ్తా సరఫరాపై ఆధారపడిన సుమారు 52 పెద్ద కంపెనీలు ఇబ్బందుల్లో ఉన్నాయి. ఆ కంపెనీల నుండి ముడి సరుకు కొనే దాదాపు 46,000 చిన్న, మధ్యతరహా పరిశ్రమలు మూసివేత దశకు చేరుకున్నాయని నివేదికలు తెలుపుతున్నాయి. సరఫరాదారులు 30 నుండి 50% ధర పెంపు నోటీసులు ఇస్తున్నారు. ఒక సర్వే ప్రకారం 70% కంటే ఎక్కువ జపాన్ పౌరులు నాఫ్తా కొరత వల్ల తమ దైనందిన జీవితాలు దెబ్బతింటాయని ఆందోళన వ్యక్తం చేశారు.

జపాన్ ప్రభుత్వం జాతీయ నిల్వల నుండి చమురు విడుదల చేస్తోంది. మే నెల నుండి అమెరికా, అల్జీరియా, పెరు వంటి దేశాల నుండి నాఫ్తా దిగుమతులను మూడు రెట్లు పెంచేందుకు ఒప్పందాలు కుదుర్చుకుంది. అమెరికా నుండి తొలి ట్యాంకర్ జపాన్ తీరానికి చేరుకున్నట్లు సమాచారం. 2027 వరకు సరిపోయేలా నిల్వలు భద్రపరిచినట్లు ప్రభుత్వం చెప్తోంది. అయితే పారిశ్రామికవేత్తలు, హోల్‌సేల్ వ్యాపారులు తమకు అవసరమైన పరిమాణంలో ముడి సరుకు దొరకడం లేదని పేర్కొంటున్నారు.