జపాన్ భారత్లో $68 బిలియన్ల పెట్టుబడి లక్ష్యం; చైనా నుంచి తయారీ మార్పు

జపాన్ రాబోయే 10 ఏళ్లలో భారతదేశంలో 68 బిలియన్ డాలర్ల పెట్టుబడి పెట్టనున్నట్లు ప్రకటించింది. టోక్యోలో జరిగిన భారత-జపాన్ శిఖరాగ్ర సమావేశంలో ఈ లక్ష్యాన్ని వెల్లడించారు. ఇది గత లక్ష్యానికి దాదాపు రెట్టింపు కావడం గమనార్హం.

గత కొన్నేళ్లలో చైనాలో జపాన్ పెట్టుబడులు భారీగా తగ్గాయి. విశ్లేషణల ప్రకారం, గత నాలుగేళ్లలో చైనాలో జపాన్ పెట్టుబడులు 70 శాతం వరకు పడిపోయాయి. దీనికి కారణాలు: ఉత్పత్తి వ్యయాలు పెరగడం, ఆర్థిక మందగమనం, అమెరికా-చైనా ఉద్రిక్తతలు, సరఫరా గొలుసులపై ఆందోళనలు. కోవిడ్ మహమ్మారి తర్వాత ఒకే దేశంపై ఆధారపడటం ప్రమాదకరమని గుర్తించిన జపాన్ ‘చైనా ప్లస్‌వన్’ వ్యూహాన్ని అనుసరిస్తోంది. ఇందులో భారత్ కీలక ఎంపికగా నిలిచింది.

భారత్‌లో జపాన్ పెట్టుబడులు ఏడు రెట్లు పెరిగాయి. 140 కోట్లకుపైగా జనాభా, అతి పెద్ద యువశక్తి, వేగంగా విస్తరిస్తున్న మధ్యతరగతి, మేక్ ఇన్ ఇండియా వంటి ప్రభుత్వ కార్యక్రమాలు ఈ ఆకర్షణకు కారణాలుగా నిపుణులు పేర్కొంటున్నారు. సుజుకి, హోండా వంటి ఆటో దిగ్గజాలు 11 బిలియన్ డాలర్లతో ఎలక్ట్రిక్, హైబ్రిడ్ వాహనాల తయారీ కేంద్రాలను విస్తరిస్తున్నాయి.

సెమీకండక్టర్ రంగంలోనూ జపాన్ పాత్ర కీలకంగా ఉంది. జపాన్‌కు చెందిన బ్రెనిసాస్ (Renesas) గుజరాత్‌లో చిప్ తయారీ ప్రాజెక్టులు ప్రారంభించింది. టాటా గ్రూప్ అస్సాంలో నిర్మిస్తున్న సెమీకండక్టర్ ఫెసిలిటీ 2026లో ఉత్పత్తి మొదలుపెట్టనుంది; ఇందులో జపాన్ సాంకేతికతను ఉపయోగిస్తున్నారు. ఇండో-పసిఫిక్ ప్రాంతంలో చైనా ప్రభావాన్ని సమతుల్యం చేసేందుకు భారత్‌తో ఆర్థిక, రక్షణ, సాంకేతిక భాగస్వామ్యాన్ని జపాన్ మరింత బలోపేతం చేస్తోంది.